Carousell西客欲以26折價錢買全新名牌BB車
日前一名作為賣家的網民於「Carousell 乞衣+西客關注組」帶圖發文，無奈地講述在二手買賣App Carousell內發生的一件事件。事緣她於Carousell出售一架來自法國著名品牌Yoyo babyzen全新未拆箱的多功能嬰兒車，而她的轉售價為$3,080，比起原價$3,500 – $4,500的BB車要便宜不少。
而星期日就有一名買家聯絡她，買家開價$800，企圖以標價的26折購買貴價BB車，更標明自己是低收入家庭及「俾BB用」，希望她可以接受$800的出價。不過見到如此無理的講價，事主似乎一開始都懶得理會。不過因為對方見她沒有回應，便在半日後再次聯絡她，希望她接受出價。而事主亦向買家直言「咁你考慮下二手車」打算終結對話。
但厚臉皮的買家卻鍥而不捨地希望她可以平讓BB車，並「大發慈悲地」加價$200， 出價$1,000企圖購買BB車。想當然爾，她是絕不會接受出價，並語帶無奈地表示：「$1,000二手都買唔到，你覺得ok？請尊重自己。低收入可以買平價BB車，無必要買貴嘢用。」
反問是否商家企圖壓價購買 事主一句爆seed K.O
原以為可以令對方打消念頭的她，沒想到是「少年你太天真了」！買家再次回覆「你是商家？」想指她並不是品牌方不應以高價出售BB車。而她亦再次無奈地回覆到：「我並唔係商家，但無責任照顧你哋低收入家庭。」然後更直接「爆seed」回應對方：「你搵錯地方，你要搵嘅係社會福利署。」一句K.O對方。最後她也忍不住向無奈地表示：「唔平賣就話我係商家……」
網民集體恥笑：不如講埋自己係乞衣啦！
事件公開後，隨即引來大批網民熱議！不少人都恥笑買家的無理而且無禮的講價行為：「低收入又生又要用貴嘢，仲要串過馬L」、「好多西客都鍾意扮學生、扮孝子、扮傷殘、扮低收入家庭，不如一開始直接講：我勁cheap的/我係收買佬/我係正宗乞衣，平啲得唔得？咁樣聽到你講價條氣會順啲」、「低收入家庭買豪宅應該叫發展商一折賣俾佢、又睇吓得唔得。感覺運桔裝窮的人真多。」
同時亦有網民嘲笑買家言論中奇怪的地方：「BB車梗係俾BB用，唔通俾佢老豆用咩！」更有同為賣家的網民公開疑似同一名買家講價的截圖，內容同樣過份，可見是名慣犯！
一日後後續更新 厚面皮買家繼續死雞撐飯蓋！
事後買家發現自己被post上Facebook群組並被不少網民轉載，就先更改用戶名稱，後再次聯絡事主，並直指「有人話你放咗啲對話上網？我開價錢，你唔賣咪算囉！」事主亦不甘示弱，直言「有人定你自己見到？我講嘅全部都係事實，我唔肯平賣就問我係咪商家！」對方反駁到：「我見你係全新，咪問你係咪商家都好正常呀？如果係商家我唔問啦（指講價）！」
後續被公開後再次引來網民恥笑，有醒目網民指出買家問她身份的真正目的：「即係商家佢就知冇得講價，唔係商家就覺得應該3折，最好免費。」而事主亦回覆到：「以佢咁講應該係咁啦！唔係商家就係善堂！」
