前酒店職員指控7大港人住酒店陋習 網民：點解要將責任全怪客人？
酒店前線職員遇上西客的事幾乎日日新鮮，最近網民一帖文惹來激烈爭議。事源有酒店前職員指自己原在5星級酒店工作，最近疑因客人投訴而被解僱，因而在網上懸求香港人「唔好因為少少事而去投訴拎著數」，並指「好老實講，因為本地客難服侍而令到好多酒店從業員辭職甚至比人炒，好難應付客人嘅需求。因為客人無理取鬧嘅投訴，員工被迫簽Warning Letter，甚至畀人炒」。而事主所指的無理取鬧共有7點，其中有一項九成人都會犯：
港人住酒店7大陋習｜1.Check-In、Check-Out 時間長
事主指，不少酒店都會推各項住宿優惠，例如以一個極優惠價錢包3餐膳食作為招徠，效果往往相當滿意，因而酒店入住率在指定日子期間會特別高。人流增加，Check-In及Check-Out的時間無異，「咁排隊等check in又有啲咩問題呢？唔好因為條排隊龍長啲，就要投訴。」
不過網民就似乎不能同意太多，指「我覺得Check-in或者Check-Out一小時內我可接受，但如果排2-3小時，真心講不能接受的，如果酒店有呢個情況，早啲通知住客遲Check-in和遲Check-Out ，我就唔使喺酒店白等。」、「我試過知道要排得耐， 所以接受佢哋提議留電話，差唔多可以Check-In嘅時候通知我哋返去，但到我哋行咗三個鐘之後一個電話都無收到，返到去問嘅時候竟然無我哋留低嘅資料，嗰間仲要算出名，兩點可以Check-In，到7:00都未上到房，咁唔投訴職員唔通就咁算？」
然而有網民反駁，指「每位客人幾點Check-in係一個權利，香港人去住酒店會講比酒店知幾點Check-In咩？如果客人無講，酒店又點會知邊個時段最多人排隊呢？而且酒店係15:00開始登記入住，資源同人手係要安排同調配架，唔係話有就有。」
港人住酒店7大陋習｜2.唔畀Tips
事主指，要求酒店從業員幫忙從來都不是問題，但香港人從沒考慮房務部的同事人工低，相反外國旅客通常也會給Tips同事，這樣令酒店同事上班心情會較高興，而且Tips「幫補唔少人工」。但網民則反駁，給Tips與否從來沒有明文規定亦不是所謂的「潛規則」，酒店職員不應把「客人畀Tips」當作理所當然。加上酒店服務原本已包括房務員的工作範圍，不明白為何沒有額外要求服務也要給Tips，不給就如做錯事般。
港人住酒店7大陋習｜3. 投訴Room Service
事主指，很多客人會因為Room Service的食物質素作投訴，表示「喺房入邊食你地想啲食物有幾好質素？唔係新鮮滾熱辣送到你面前就投訴食物唔合格，不過亦有網民指「我自己就唔會投訴嘅，不過你講到間五星酒店啲服務做唔到係應份，我就真係認同唔到」、「你覺得員工無錯但其實客人都有畀錢，唔代表咁就要食唔熱嘅食物，你覺得人手唔夠係應該向酒店反映而唔係咩都賴客人。」
不過除了以上三點，其他「懇求條件」大家也表示理解，而事主亦指以下4大情況經常發生，望大家注意自身行為。
港人住酒店7大陋習｜4.帶外來食物到酒店要求加熱
事主指，酒店沒有義務為客人帶來的外來食物加熱，但不少香港人也會提出這要求，但又不願支付煮食費，當職員告知不能為其提供此免費服務時反被投訴。網民對此大多表示認同，因「酒店大可以話基於衛生理由唔幫客人翻熱外來食物，若客人食咗幾啖，幾個鐘後叫翻熱，咪會有埋佢啲口水」、「我去過某酒店，有一項收費食物加熱係收 $25。這樣明碼實價也好」。
港人住酒店7大陋習｜5.額外驚喜服務
亦有人會在紀念日或生日時入住酒店慶祝，客人自然地要求職員在特定時間送蛋糕到房間，但很可惜的是由於「好多酒店住客要求同一時間，即零時零分送到上房，但因酒店返通宵更嘅同事人數有限，根本無可能全部都搭正12點送去」，並指「一間好啲酒店入住率坐底都有150間房，咁多人生日點樣送呢？」但當未能準時送達時，客人便會作出投訴，職員只可無奈接受。
港人住酒店7大陋習｜6. 叫外賣卻要求職員送上房
在酒店慶祝時，有人會選擇叫外賣在房入面食。事主指，「大家都明白有個別客人選擇喺房食嘢，叫咗外賣請自行落大堂自取，而唔係叫大堂嘅員工送上房。而且食完唔該自行收拾好，而唔係叫房務部嘅同事入房執外來食物嘅殘渣。」
港人住酒店7大陋習｜7.投訴食物「凍晒」
相機食先這個指定動作，相信有九成人都會做。事主就指，很多客人會在食物送到房間後不停拍照打卡，當完成自己的打卡工作後便致電投訴「啲食物凍晒」，原本客人的責任反而變成職員的錯，所以事主懇求大家「酒店食物請即刻進食，而唔係放喺度影完相就再投訴話啲食物凍，咁樣合唔合理呢？」
最後事主表示懇請各位香港人手下留情，在自己享受服務的同時也顧及一下酒店職員的辛酸。對於事主的表態，有網民指這是香港獨有的奇怪現象，亦深感前線遇到的困境非常艱難：「辛苦晒你們，希望那些酒店住客和員工有些問題互相包容尊重」、「唔講唔知客人有咁多無謂要求」、「其實酒店本身都要自己檢討吓，管理層好大責任」。
不過亦有前酒店職員及住客指「近年多次住酒店，我真心極客氣查詢，但有部分職員真心黑面回覆。我認為雙方都有進步空間」、「 好多酒店問多2句都唔想應，有時我寧願你彈2句我聽等我知道唔可以問，而唔係十問九唔應，依家咩態度，借咗聾耳陳隻耳？」、「酒店起碼要有基本服務，以上7點有一半都係基本要求，如果無服務點解我要住酒店，返屋企唔好？」
