港媽力數迪士尼攝影師4宗罪：無美白無排隊攞位　網民：新型詐騙?!

近日於FB群組「香港突發事故報料區及討論區」中流傳一張圖片，當中一位港媽用千字文力數迪士尼攝影師4宗罪，更稱要求攝影師自費入場，再次幫港媽免費任影3小時，不不接受的話就會放上網，再向迪士尼投訴攝影師。不過後期有攝影師稱原來他們是 NGO的義務攝影師，由入園到出園影全日只得$500 （不包膳食）。

迪士尼攝影師4宗罪：無擋遊客

港媽指：「全家福背景太多人影響質素，身為攝影師應該有義務搵助手阻擋其他遊客，咁張相先會靚」。

迪士尼攝影師4宗罪：無美白

港媽指：「另外請預計個天氣問題，嗰日拍攝好熱，我啲皮膚你冇幫我後期執一執，冇將我美白」。

迪士尼攝影師4宗罪：無幫手攞位

港媽指：「你應該要搵一個人幫手排隊，冇理由剩係得旋轉木馬嘅相，過山車啲相都要有，喺餐廳啲相呢，係影得幾靚，但係冇人幫我哋排隊攞位，啲相影得幾靚都冇用」。

迪士尼攝影師4宗罪：買嘢無折

港媽指：「我以為你係攝影師喺迪士尼樂園可以買嘢有折，原來你冇㗎，令到我好失望」。

港媽提出解決方法：畀我哋家族任影三個鐘頭

港媽亦提出一個解決方法：「你做賠償畀我哋家族任影3個鐘頭，迪士尼食飯嗰喲我畀，請埋你助手，但係自己要自費買迪士尼入場券，如果你唔應承嘅，我就會擺你上網，我係迪士尼投訴你！你諗諗啦！」等。

網民鬧爆：真係人無恥便無敵

網民就指不如自己包場：「要影咁多野又要靚天又要少人，不如去綠幕度影p返上去咪算，仲唔使曬又有冷氣添」、「攝影師只係負責影相，點會幫佢排隊/買嘢食」、「仲要幫你擋其他遊客？佢以為自己係邊個呀」、「咁大口氣，不如包起個場」、「真係人無恥便無敵」、「攝影師要識埋天氣」等。