清明節當日，有名網民於Facebook群組「大埔 TAI PO」發文，文中附上一張區內街邊燒臘舖的相片，相片中可見燒臘舖門前大排長龍，看似十分受區內市民歡迎。而事主顯然不太喜歡這間燒臘舖，他表示：「呢間都咁多人幫襯！真係數臭你！」
回想起一年前的清明節，事主指曾到這間燒臘舖購入未斬件的原隻雞及整條燒肉。拜祭完畢後時間已經下午，他回到「無乜人」的燒臘舖要求「售後服務」，向店員表示需要斬件，卻反被店員「咿咿哦哦」，直指他「阻住晒做生意」，店員雖不情願，但最後都有為他斬件。事主幫襯這間燒臘舖多年：「年年都係咁，年年幫襯佢」，但去年這件小插曲卻因店員的舉動，令事主懷恨在心。
事主的公審文引來大批網民熱議，但網民卻是一面倒批評事主是西客！網民們紛紛表示：「樓主仲話年年都係咁，年年幫襯佢，大佬人哋之前幫你咁多年你唔出post幫手讚下服務好，上年唔斬你就要唱衰仲要心懷怨恨足一年」、「拜完先拎返去，如果無logo嘅包裝，其實都唔知記得你係邊個」、「你攞咗啲食物去咁長時間，返到嚟又要人幫你斬，點知你會唔會帶啲菌返嚟呀？ 」、「去㩒鐘仔完事走人，轉個頭返去話想渣吓個波，你話得唔得？」。
亦有網民表示，燒臘舖在春秋二祭時的確有事後斬件服務，但是必須要提早揚聲：「之前有講拜完後攞返去斬，舖頭話得咪得」、「除非你買嘅時候同佢講明你會拎返去畀佢斬，而佢又答應你，咁你就無問題」、「的確係得嘅，但係斬係人情，唔斬係道理囉」。但亦有網民回應：「 如果我知道有客拜完神， 會拎返隻雞嚟斬，斬料師傅又要摸過拎返嚟隻拜神雞，咁我會幫襯另一間算」。
另外亦有街坊為燒臘舖平反，指涉事燒臘舖老闆與店員都十分貼心，但同時也指出作為顧客的態度也十分重要。她表示自從搬入大埔後，每年都會幫襯燒臘舖：「上至20蚊叉燒切粒，下至每年去文武廟還神訂乳豬，佢地都無話啲咩，仲好好傾」。她更分享親身經歷：「前2個星期我隻狗走咗要去送佢，去佢到買雞脾，老闆問我做咩眼紅紅，話比佢知，個陣無淨脾都切隻畀我。」
不過被大批網民炮轟後的事主仍然口硬，面對叫他「唔好del post」的網民，他也回擊：「點解del post？！當面對質都得！」更硬氣表示：「唔緊要，我春秋二祭都係咁做，仲幫襯好多間大埔燒味鋪添。咁唔like既你唔好去！唔駛曲，唔駛直！你就去我影相個間吧！無問題。」
