港男問「蠟筆小新VS大雄，誰是終極廢人」？
該名港男於帖文中指自己從網上看到一個討論話題，指「上網見到有人講大雄定係小新廢啲？ 」，然後指自己小時候看大雄時，都還沒有覺得他很「廢」，但長大後再翻看一次卡通片，則前所未有地覺得大雄「真係幾廢」。他指「成績 ，體育不在話下， 每一次被技安同阿福恰嘅時候就返去搵大佬『叮噹覆桌』， 但每一次嘅法寶一係就俾人搶，一係就搞到天下大亂， 基本上好似每一樣嘢都無樣嘢做得好」，更指他唯一做得好的事情就只有偷看靜兒洗澡， 令他體驗到中國人一句俗語： 「寧生敗家仔， 莫生蠢鈍兒」的道理。
而對於「小新」則沒有刻意的批評，但卻惹來一眾網民出聲反擊，指「蠟筆小新一啲都唔廢」。
網民力撐蠟筆小新「係太醒」：佢有好多技能無人講
網民隨即數小新4大功名，指他根本是「醒目得濟」，大雄根本沒有得比。網民留言稱「小新邊度廢！小新不知幾叻」、「小新都唔使用法寶」、「小新做手工好勁，點解冇人講，變身嘅衫都係佢自己做」、「佢用刀削蘋果皮可以唔斷一條完整咁」、「越講越多特技，淨係下盤幾咁有力都已經唔駛講」、「小新最過人之處係有主見，佢唔要有錢女要成熟凹凸有致嘅姐姐」、「小新救過好多次地球，大雄差啲毀滅地球幾千次」、「小新不知幾醒，做過特務又拯救世界，保護地球」、「一個幼稚園，一個小學生，拎嚟比都知邊個廢啦」。
更有網民指「單論頭腦，小新仲聰明過同書角色嘅風間；論實力，佢咩都係靠自己，無用過咩法寶；論愛心，佢收養小白視如自己親細佬；論友情，春日防衛隊5人感情唔在講，同風間直頭兩兄弟（有套劇情版寫過佢兩個之間嘅友情）。相反大雄，佢係客觀人設上嘅全書最廢，廢過任何一個書中恆常角色，人又自私，又懶，又蠢，又唔承認自己能力問題。小新同大雄，兩個人設相差太遠」、「不如問大雄廢定小丸子廢」。
