單親媽媽帶兒子到婚紗店欲租婚紗影全家福
日前慧子婚紗 Mrs. Tse Bridal店主於自家Facebook專頁發文，分享一則工作趣事。店主表示最近有名單親媽媽帶兒子到店內義租婚紗，打算2人一起影全家福。在媽媽試身時，店主安排仔仔坐在美甲枱前等候，媽媽在入試身室前提醒仔仔：「你最好同我坐定定睇電話，警告你唔好又搞人啲嘢！」之後店主與媽媽試身期間，忽然聽到耳熟能詳《唐伯虎點秋香》的對白，「呢啲唔係紅豆！係我新發明嘅暗器霹靂雷珠！」，聞言小朋友便大笑：「哈哈哈哈，霹靂雷珠！」
奀皮仔仔扮周星馳 美甲枱染色＋撈亂鑽石
當媽媽試完身後，便打算問問仔仔著婚紗美不美，突然就一聲尖叫：「呀！你搞乜鬼？」店主循聲音抬頭望去，竟發現仔仔將美甲用的紅色鑽石貼到面上，並指著自己的臉說到：「媽咪，呢啲係我新發明嘅暗器霹靂雷珠！哈哈哈哈」但店主此刻卻笑不出來，因為白色美甲枱有顏色染上，彩色鑽石也全部撈亂，「我最害怕嘅畫面出現了」！
阿媽即時身教：一係賠錢，一係逐粒分返佢！
正當店主擔心要如何處理時，媽媽直接霸氣手起刀落啪一聲打仔仔屁股，然後開始捉住仔仔拿濕紙巾抹閃粉，同時一直道歉。
👩🏻🦱：「你個衰仔‼️去親邊度都搞破壞，你撈亂哂啲閃石人哋點賣？🤬」
👦🏻一路嗚嗚😭：「我嘅暗器霹靂雷珠呀⋯⋯😭」
👩🏻🦱：「你一係攞銀包出嚟賠錢，一係同我留喺度逐粒分返佢！」
👦🏻：「我頭先喺AEON度已經賠咗😭冇錢啦！😭」
👩🏻🦱：「你搞完破壞唔使負責呀？即刻同我逐粒分返佢😡」
轉個頭阿媽尷尬苦笑表示：「真係唔好意思阻妳。但錯就要負責！佢頭先去$12店又係打爛人啲嘢，激死！我唔會縱㗎，做錯事一定要負責，整爛嘢就賠錢啦！」店主指自己十分欣賞這種家長，教小朋友勇於承擔，而不是像某種家長只會推卸責任「他只是個孩子」要全世界圍著小朋友轉。即使自己小朋友有錯在先，都覺得係人哋的錯、社會的錯。最後媽媽與仔仔在店內用了2小時分好被撈亂的鑽石，清潔後才離開。
網民大讚媽媽處理方式：好多拿拿聲拉走佢就算！
事件被店主公開後，引起大批網民討論，不少人都大讚媽媽處理方式，沒有推卸責任，更藉此教導仔仔：「依家真係好少有咁識教仔嘅媽媽！發生咁嘅事好多阿媽都會話細路仔唔識，細路係咁㗎喇或詐詐諦鬧個細路跟著就拿拿聲拉走佢就算！」、「太細個真係唔知咩叫後果。小朋友本身就鐘意探索，純粹悶又有野吸引佢咪咩都要試下搞下，仲要係啲咁新奇未見過既野。要學自控同識後果都唔係幾次就會學識，要慢慢嚟。至少睇到媽媽肯教，小朋友肯做，已經是好好了！」
網民同樣大讚店主：其實你亦幫緊個媽媽教仔
同時也有人指店主的處理方式同樣十分好：你真係好好，如果我係個媽媽，我都寧願要佢分返佢而唔係用錢去解決，其實你亦幫緊個媽媽教仔。不過出面做生意邊咁好心機肯花時間陪人教仔吖」、「其實你真係好好，尤其係香港，啲人見到個媽媽咁樣，就會鬧個老母唔識教，鬧個老母好郁手郁腳，唔會比空間佢地自己去慢慢睇清楚件事。」
不過也有熟悉《唐伯虎點秋香》的網民搞笑表示：「我仲以為阿媽問仔佢靚唔靚阿仔會話朱茜你攪咩呀朱茜」、「霹靂雷珠個結局好似係『咩吖？會爆？』，但係老板娘EQ高冇爆到。」
