Tatler主席表示有協議會出場 最後決定撤回資助
主辦方Tatler主席晚上6時舉行記者會回應事件，差不多6時10幾現身，表示Tatler同國際邁阿密CF的協議中，隊中球星包括美斯（Lionel Messi）、佐迪艾巴（Jordi Alba）、沙治奧布斯基斯（Sergio Busquets）以及其他於比賽前加入球隊的著名球員（如蘇亞雷斯（ Luis Suárez）），寫到明球員除非受傷，如果唔係都會上場作賽。喺週日，名單中人氣球員美斯及蘇亞雷斯均列入後補名單中，令佢相信2人會出賽，但賽時上半場知道美斯及蘇亞雷斯無出場後，已立即通知政府，並要求美斯發表講話，但無功而回。最後佢表示就事件決定撤回M品牌、申請1,600萬元政府資助。
網民唔收貨：講咗等於無講
對於Tatler主席一起初遲遲未現身，唔少網民都笑言係咪連主席都no show，又表示聽完個記召後好似無聽，結果都係將責任推返俾球隊「世紀大騙局」，加上有傳媒報導，這次國際邁阿密與港隊的比賽，門票價格由880港元到4,880港元不等，光是正賽門票收入，估計收入高達1.2億港元，當中分別為4,880港元約有10,723張，為5,233萬港元；2,980港元的門票有13,253張，為3,949萬港元；而$2,280、$1,580及$880港元的門票涉及15,959張，金額高達2,839.6萬，以上的收入仍未計算練習賽門票收入以及周邊商品的收益。因此令不少網民表示：「就算政府cut晒資助，佢地打跛腳都唔洗憂」、「已賺到凸，唔要$1600就拆得掂？如果隊波一開始話美斯唔嚟，4百蚊張飛都唔會睇罷！」、「呢鋪擺明割香港韭菜」、「讀完稿 就收工」、「TATLER :而家我連錢都唔要 你吹得我漲?」、「水魚之都」、「責任全在美方（球隊）」、「講咗等於無講」
楊潤雄、黃德森記者會：下半場應承咗會出場
文化體育及旅遊局局長楊潤雄和體育專員黃德森今日（5日）都有就事件舉行記者會，表示主辦方一直承認美斯會落場，就算上半場無，下半場都答應了會出場，一直有同主辦方緊密聯絡，最後完場前10分鐘確認美斯因為受傷不能出場後，都有要求主辦方作出補救的措施，希望主辦方繼續同球隊溝通。局長認為主辦方要出來解釋，美斯受傷的程度係咪去到唔容許佢落場？被問到局長係咪卸膊時，局長就指佢哋有做足本份，與球隊溝通係主辦方的責任。唔少網民都形容今次記者會係「乾淨利落記招」，將全部責任歸咎主辦方。
