日本發現海水樣本含有氚 網民向K Kwong挑機：食咗魚生未？
據日本傳媒報導，東電在排放口東北面約200公米處，檢驗出氚濃度為每公升10貝克，由於在安全範圍內所以會繼續排放。值得一提，世界衛生組織（WHO）規定飲用水的放射性物質不可高於每公升1萬貝克，而按現時東電的計畫，假如每公升氚濃度超過350貝克，必須確認設備是否異常，而每公升超過700貝克更會停止排放。新聞一出有網民就向K Kwong挑機表示：「食咗魚生未？」
K Kwong列4大原因反擊網民：你身上都有氚，做乜你啊媽生你出嚟？
其實在日本排放核廢水後，K Kwong已經為解答網民對於事件的10個迷思，今次他就用4大原因力證自己未驚過，直言：「一切毒性在於濃」，當中就列舉出核廢水部分的化學元素其實在日常生活中亦都有機會接觸到。
- 我哋身上都有氚、碳14、鉀40、鍶90、銫137、碘131
- 你飲嘅茶有氚、碳14、鉀40K、鍶90、鐳226、釷232、銫Cs
- 你食嘅煙仔同二手煙有氚、碳14、鉀40K、 鐳226、釷232、銫Cs、釙210、鉛210
- 你屋企仲有氡86
為此K Kwong表示「你驚唔驚？K仔唔驚！因為濃度低！」當中更串爆反擊表示：「唔識就學人挑機，就係喺（排放口）幾十米內海水有幾Bq/L（貝克單位）咁大把！世衛標準10000Bq/L。你身上都有氚，做乜你啊媽生你出嚟？」令不少網民紛紛讚好：「幾時都講，讀書真係好重要」、「其實吹風筒都吸緊大量（輻射）」。
K Kwong為網民拆解核廢水10大問題
核污水的排放令不少人感到擔心，而K Kwong就在社交平台上列出10大迷思解答大家的問題，當中居然大讚日本海產好安全，更表示自己以及孫仔都會繼續食用日本的魚生及生果，直言：「我會飛去日本食！唔好同我爭」。
問題1：怕唔怕福島核電廠水？
答：唔怕，因為濃度低
問題2：支持政府禁日本10個縣海產品嗎？
答：唔支持禁，搵嘢嚟做。
問題3：以後唔畀入口，對你有乜影響？
答：冇乜影響，一向好少係香港食日本嘢，因為貴過日本好多，亦冇咁新鮮。我會飛去日本食！唔好同我爭！
問題4：係咪你自己唔怕死咋？
答：我個孫都食日本生果喎！
問題5：咁你真係唔驚？
答：我驚啊，我驚佢啲核污水未排晒就再一次「東海大地震」，咁就一次過乜都未處理過嘅污水就排晒落海，全球漁業真正大鑊。我短期內會再去日本玩，唔好同我爭！
問題6：東海大地震嘅風險高嗎？
答：好高，所以積埋咁多污水唔係好事。
問題7：會影響日本生果嗎？
答：唔會！唔會！唔會！海嘅水係上唔到陸地灌溉系統嘅！
對於網民擔心水循環會令雨水會降落陸地，從而影響農產品都有問題，K Kwong表示海水蒸發會將非揮發性的「鍶（Sr）」、「碳14（C-14）」、「銫（Cs）」等的無機鹽留在海水中。而水和氚蒸發後，雨水中的氚含量會再降低，這些氚同樣會留在海水中。
問題8：氚同碳14會永遠留係身體內嗎？
答：唔會！唔會！唔會！佢哋生物半衰期得幾日。
不過就有網民不解：「『半衰期』 和 『生物半衰期』有什麼分別？」K Kwong回應：「即係生物體内留到幾耐，有好多放射性同位素唔能夠留喺骨，所以入咗身體好快排返出嚟。但有部分好似入到骨嘅「鍶90」半衰期係30年。係骨就真係半衰期30年，但係血液就得20日」
問題9：如果啲水冇事點解你唔攞嚟飲？
答：係經過海水稀釋咗嘅水無事，即濃度低到冇影響，但係我唔會飲海水。尿都冇事我都唔會攞尿嚟飲喎！
問題10：你賣國賊先至支持日本政府！
答：唔係日本政府做嘅所有嘢我都支持，最重要係透明度。好多國家都冇透明度。
化學博士回應仍未能為網民解憂 反引起質疑
不過K Kwong解釋後仍被網民質疑，指「請不要以為自己是最權威、最有料的科學家！自己年紀大，唔死都大半世啦！不要悟導（誤導）人，害人！」、「你咪去囉，關我X事咩？三九唔識七，你要死唔俾你死咩？不過你打編（篇）嘢出嚟，啲傻人真係跟你而出事，你落一萬次地獄都唔夠」等等。而面對質疑，K Kwong向來以科學解說，所以他亦回應該網民指「我冇咁講，不過你可以用道理講贏我，請亮刃。否則閣下只係_up」。