晚飯時間餐廳無白飯提供、食客無法相信
該食客日前於Facebook群組「飲食黑店大全」出post，分享了與家人外出晚飯的經歷。樓主指當日是為了補祝父親節，因此一日就訂了太古城君頤上海小廚的座位，一行多人準時到達，並點了「點了6個餸和小籠包」，樓主見所有菜式都到齊後，就再叫5個白飯，但侍應竟回應「沒有白飯，白飯賣晒」，樓主無法相信，心想「晚飯時間去上海菜館食飯，但竟然冇飯？做左幾十年人都未試過」，又強調「我哋屋企個個都係飯桶，尤其是我爸爸，他一定要食飯的」，現在叫了一整桌的餸菜後，竟沒有飯，樓主覺得不能接受，遂叫經理出來解釋。
經理解釋無誠意，更發晦氣：「你哋唔食咪走囉」
樓主質問「點解晚飯時間冇飯又唔一早講」，經理來到後指「佢哋都係啱啱先知」，樓主問經理可否馬上再煮，他們願意等，但經理竟回覆「飯煲壞咗」，樓主即時著火，斥責「飯煲壞咗點解我哋入嚟嗰時唔講？我哋可以選擇去其他飯店食飯，而唔係所有餸到齊先講，而且我係訂枱的，我有留低電話號碼，點解唔一早講」，經理繼續以「啱啱先知」作擋箭牌，更開始反罵樓主「唔講道理，又盲塞唔聽人解釋」，態度非常惡劣，更發晦氣講「你哋唔食咪走囉」，樓主怒火上升，打斷經理說話。
同場食客人人無飯食、樓主斥餐廳故事隱瞞
樓主自認當時聲量不細，引來其他食客注意，指坐隔壁的食客都忍不住聲援樓主，指「佢哋都係一樣冇飯食」，樓主指出重點，強調該枱食客已經準備埋單，直斥「經理講大話，佢唔係岩岩先知冇飯，唔係飯煲突然間壞左，而係佢一早就知冇飯，但有心唔同顧客講，等客人入坐後叫晒餸先講」，又留意到之後有新客人入座，餐廳也沒有跟他們說，似是刻意隱瞞沒有白飯。
樓主因此怒轟「呢間君頤上海小廚做生意嘅手法非常有問題，個經理更加係無法無天」，又指「服務性行業，一向都係顧客為先，無論怎樣都唔應該鬧客人」，更質疑「我出街食飯慶祝父親節，我叫白飯有錯嗎？咩叫一家人食飯呀？咩叫出街食飯呀？唔通叫出街食餸呀？個個都係約人食飯架啦，有冇聽人講係約人食餸呀？最重要係飯呀，你打開門口做生意，你冇飯食係咪應該喺我入座前講清楚呀？而唔係所有餸黎晒先講」，怒氣十足！
餐廳稱可提供炒飯、樓主「食到一肚火」
樓主續指，當時他們不想再和經理爭論，樓主爸爸已經多次要經理走開，但「佢唔行開不特止，仲不停話返我」，樓主因此非常氣憤，更指「如果我入坐前佢同我講，我會選擇同爸炒麵或者炒飯供應，爸去另一間飯店食飯，唔會食到一肚火」，後來擾攘一陣後，侍應指餐廳現時有炒麵及炒飯供應，樓主於是叫了一碟炒麵和一碟炒飯，但直言「唔係我哋想食嘅嘢囉，如果要食炒飯直接去茶餐廳食啦，洗乜叫餸食飯」，最後更提出對餐廳的2大指控：
1.冇飯唔緊要，一早講清楚等客人自己決定食定唔食
2.冇講都唔緊要，但起碼要認錯，同客人解釋返點解冇飯，而唔係鬧返客人，同客人罵戰甚至想趕客。
最後再呼籲大家「如果想食飯就千祈唔好去太古城君頤上海小廚了，因為晚飯時段都唔會有白飯供應」，也有再次提及該經理：「惡霸經理，會狂鬧客人不特止，甚至想趕客，今時今日咁嘅服務態度，真係要諗清楚」。
出現兩派意見：無飯食會死？vs餐廳好有問題
樓主的分享引來不少網民討論，有網民認為樓主小題大作，為了一碗白飯弄得場面如此難看，更要寫千字文投訴：「冇飯食，世界末日啦」、「無白飯食一晚會跳掣嘅白卡一家，仲有嗰啲垃圾思想，服務業以客為先嗰啲」、「冇白飯咪食炒粉炒麵，本身就好閒，係樓主太執着」、「睇篇文都估到你當時嘅情緒係幾咁癲，當街發癲X人真係好核突」，更質疑樓主的人格：「寫咁長篇嘢又唔分段，平時一定係有佢講冇人講」、「比一千幾百出嚟食飯，使唔使全體員工下跪道歉全單免費？」。
不過也有不少網民撐樓主有理，認為餐廳的處理方法的確有問題：「好多人都唔知老人家同上咗年紀通常都係要食白飯先有滿足感同飽肚，我支持樓主呀」、「冇白飯係小事，佢咁昆客先係仆街」、「明白樓主心情，重點係經理隱瞞事實瞞騙顧客」，也有人點出餐廳的計劃「好嘢，無白飯但有炒飯供應，變相叫多一碟，收多碟錢」、「咁都得比我即走了 接受唔到做生意咁唔老實」；更有人直言「睇留言就知香港人幾咁縱容西餐廳」。
也有網民指出餐廳要解決此問題其實非常簡單：「嗱嗱淋去茶餐廳買囉，10分鐘都解決啦」、「乜咁大間野冇蒸櫃呢樣野？ 定廚房佬唔識蒸飯？」；更有行家分享做法：「我都係開餐廳嘅，有次個蒸爐壞左，蒸唔倒飯，我哋都即刻出去買啲白飯回來頂住先啦」，不過即時有網民指出重點：「明顯係個經理唔想做俾佢，仲想呃佢叫炒飯，擺明玩嘢」。大家又覺得此事誰是誰非？
