買燒味遭「雙偷」：偷工減料、偷龍轉鳳
事主在「香港茶餐廳及美食關注組」發文，控訴一間燒味店涉嫌偷工減料及偷龍轉鳳。他表示當日落單「一條燒腩骨要砍」後，燒肉切割員報價100元，就著事主去收銀付款，怎料回家後打開飯盒後就發現份量極少之餘，亦懷疑是以平價的沙尼篤（被視為較「下欄」的部分，通常肉質乾瘦而難嚼）代替貴價的燒腩骨，皮還燒燶了，於是出帖並附上相片，提醒一眾網民要「睇路」。
連鎖店出品差劣 寧光顧相熟酒樓
不少網民見到相片後都炮轟肇事的店鋪，「用咁多錢去賣廣告和交租，食物差啲才有錢賺」、「好多連鎖店出品馬虎，早期唔錯，愈做愈差」、「好似俾旺財食嗰啲」，又有網民認為「先唔講肉靚唔靚，斬完都排返好佢啦，完全無隊型」、 「啲肉有大有細，完全唔似一條」。網民提供購自另一酒樓的燒肉，明顯足料兼有隊形，令人唾涎欲滴。
行內人分享3大秘訣揀靚燒味、避中伏
1.視線範圍內才斬件
只在視線範圍內才可要求燒肉切割員斬件，「見唔到嚿肉千祈唔好被佢斬，肯定少兩嚿」，同時可防止偷龍轉鳳，「買燒鵝得燒鴨」。
2.原隻上
有網民會要求「原隻上、唔好斬」，「食燒鵝脾碟頭飯是同樣道理，要原隻鵝脾上，不然會少1、2嚿，雖然不會是重要部位，否則傻仔都會睇得出！」
3.寧外賣避堂食、留意肉質色澤
若想吃當天新鮮出爐的燒味，網民建議最好選擇外賣回家，因為店方「通常都是將最新鮮的掛在檔口賣，客人指定嗰嚿就切嗰嚿，相反，食碟頭燒味飯就給你隔夜貨」；分辨燒肉是否隔夜，因為隔夜肉經雪櫃冷藏，「肉骨那邊較乾枯，色澤暗淡」，新鮮出爐的燒肉的肉骨那邊則光亮而有自然色澤。
