相信各位有過大大小小的理由導致誤機，錯過航班。今日一名乘客準備由日本飛往香港，距離起飛時間2小時到達機場，但最後竟然會「Miss咗班機」。事主怒氣沖沖將事件始末放上討論區，但帖文反而惹來網民大量負評，笑事主「傻仔」。

港男早到機場2個鐘誤機　鬧爆登機櫃位無地勤　網民：執咩行李執成粒鐘

今日（16日）一名香港快運的乘客在討論區上以「香港航空公司又出事！！！」為題，指他日前準備乘坐凌晨1點的航班，由日本飛往香港，但就因為登機櫃位無地勤，使他最後未能登機。事主又鬧爆空姐態度差，更稱「今次係第一次搭，亦都係最後一次搭」。網民笑事主：「多謝提供笑話一則」。

港男鬧香港快運 Miss機港男鬧爆登機櫃位無地勤 — 港男鬧爆登機櫃位無地勤（圖片來源：unsplash@Phil Mosley）

11點到機場執1個鐘行李　12點竟無地勤幫手Check In?!

事主準備乘坐凌晨1點的航班，所以提早2小時到達機場，打算用1個鐘執行李。但12點未到，櫃位的地勤已經「人影都無個」，用盡所有方法搵間航空公司，連機場工作人員都聯絡不到。

直到12點50分才有地勤聯絡事主，指航空公司12點正會停止Check-in，期間之所以失聯是因為正幫其他班次Check-in。地勤最後以「香港快運將保留最終決定權」為由，拒絕讓事主上機。

事主嬲爆寫千字文

事主嬲爆指：「請問你地間航空公司有冇咁缺人啊，一個空姐check in 就無其他人可以聯絡」、「一直唔承認佢哋有問題，所有嘅問題都喺我度」、「同你哋講嘢好聲好氣，你就咁樣對待你啲乘客」、「今次係第一次搭，亦都係最後一次搭！」。

網民：執咩行李執成粒鐘

網民就笑事主：「你一個鐘check-in係淨係畀你登機，唔會畀你行李寄艙」、「至少提早個半鐘check in是常識吧」、「遲到仲聲大夾惡」、「樓主第一次搭飛機？」、「全個地球都係咁運作」、「check in同boarding gate班地勤係同一班，班地勤好有可能一夠鐘就入禁區準備boarding」等。