港媽怒轟茶餐廳逼踢櫈仔仔調位：不經意咋嘛！
日前有名港媽於Facebook群組「香港茶餐廳及美食關注組」 發文炮轟一間荃灣茶餐廳掌櫃（職員）的服務態度，更激動表示「越諗越火滾」。事緣當日港媽與兒子於晚上9點左右到該間茶餐廳用膳，據她所指，當時坐在卡位的仔仔「不經意地腳踢到卡位」，影響到背後同樣坐在卡位的食客，但經她勸籲後仔仔即時沒有再腳踢卡位。
不過在一旁的掌櫃卻硬性規定仔仔必須調位，以免行為影響其他食客。但港媽卻指「兩邊同樣有人坐喺到，只要無再踢就ok」，不過掌櫃反駁到「次次都踢櫈，再踢我就趕出去㗎啦！」令她忍無可忍大鬧到：
得你呢度有得食吖，好生意啊！
（當中掌櫃的得意忘形樣就不必描述了，滿面大道理的習非成是😡）
圍爐失敗反被群嘲：教好個仔先帶佢出街啦！
不過她欲圍爐取暖的帖文卻並沒有得到網民們的同情，更被大批網民群起鬧爆！不少人都恥笑她「自爆西客行為」，直斥她「仲好意思出post個吓犀利」！更有人提議見到此post的各位茶餐廳老闆將這對母子列入黑名單，拒絕做2人的生意：
【教仔係你嘅責任 】「好心你教好個仔先帶佢出街！ 你去任何一間餐廳都『唔會歡迎你踢到人哋啲客人』啦！」
【包場咪任踢囉！】「咁巴閉，有錢咪包起成個場任你仔踢上天空再耍套拳囉！！ 人哋老闆話得你啱㗎喎！ 同埋我覺得佢係唔想再做你生意+同你教仔！係你條氣唔順要起度發怨氣啫！」
【揈少陣會死？！】「同戲院巴士俾細路踢櫈一樣咁討厭。即使喺MTR，同一排櫈嘅死細路踢櫈都係衰格，影響晒成排櫈嘅人。死細路對腳揈少陣唔得咩？」
【肯定唔係第一次】「如果淨係一次（唔覺意），人哋點會咁大反應！你個小朋友影響咗人好耐你自己唔知呀？」
個阿媽話「不經意地」來形容阿仔踢櫈，潛意識佢都覺得係小事👎🏻
你試吓喺餐廳食嘢，隔離對男女「不經意地」互摷，會唔會俾人X呀？
又或者一個上咗年紀嘅阿叔，「不經意地」咳too吐痰喺地下、會唔會俾人X？
唔好用「不經意」去合理化啲滋擾行為啦！
又一個生仔要考牌嘅系列，其實生完啲人係咪真係腦閉塞嘅呢？踢完櫈，人哋要你調位，其實有乜問題？即係你要人哋接受你個仔會踢櫈，但係就接受唔到人哋叫你個仔調位！大家都係嚟食嘢啫，點解你要逼人地接受你個仔呀？仲覺得自己好有道理！真係好嘢！有冇諗過呢其實踢櫈係一個習慣，好明顯樓主冇諗過矯正個仔，所以唔係一個獨立事件，真係一個教育嘅問題，完！
港媽唔忿氣反駁 反被網民點出問題所在
被網民恥笑的港媽疑似「唔忿氣」，留言反駁眾多網民，指茶餐廳職員「生安白造」，「何來次次吖，一個月都冇兩次去食嘢」，不過反被網民反指「去2次踢2次櫈都係次次踢櫈」，職員並無講錯。見自己無法反駁大批網民的批評，港媽就狂loop「唔好知啲唔知啲！有本事叫個店員自己睇CCTV啦」，最後更關閉帖文留言功能並「深潛」了事。
