港女日本賞櫻超失禮 為影相用腳架打人
近日，就有網民在Facebook群組「HK Express 香港快運及旅行資訊關注組」發佈一則貼文，當中講到自己週一（25/3）於新宿御苑睇櫻花，當時大家都非常有秩序地排隊影相，此時一位男士攞着相機拍照時，突然有位女仔手持腳架及手機走近男生，起初事主以為二人識，豈料時候發展急速轉彎：「個女仔突然間大聲『接』一聲，攞起腳架打落男仔隻腳，跟住就行開去第二個位影相。個男仔講咗一句wtf，個女仔就好惡、好大聲用粗口問候男仔娘親，鬧個男仔影相影咗好耐阻住佢影」，值得一提，由於該女生有著「好純正港式粗口」，因此事主就認為對方同樣來自香港。
港女爆seed狂爆粗+惡人先告狀
樓主當時正在拍攝，因此二人的爭執一同拍下來，他發現其實當時男生只是拍攝了38秒左右，並非港女所說的「影咗好耐」，而港女隨後的行為更是越發失禮：「個女仔就一路講粗口，好大聲好嘈好失禮，個男仔叫佢收聲」
而港女就用電話拍下男生的樣貌，遭對方一手推開，之後港女疑似想惡人先告狀：「個女仔不停大叫用中文同英文話好驚跑去搵公園警備員，個女嘅不停咁大叫話自己一個人嚟旅行依家好驚，話個男仔襲擊佢。」
港女失禮行為驚動日本警方 結局睇到網民一肚氣
被襲擊的男士馬上叫警備員報警，港女得知事件後即刻表示自己趕時間走先，就遭警備員制止，不過涉事男士卻如對方所願讓對方先走，而自己在現場待了一會兒亦都走了。
由於警察事隔很長時間才到達現場，當時現場的兩位主角都已經先後離去，僅樓主在現場，因此他就把手中的影片交給警察，而當地警員亦都表示：「個女仔的確係犯法，不過個男仔走，警察話會試下聯絡個男仔同叫我哋將手機條片畀佢哋幫個男仔，所以睇下有冇辦法聯絡過男仔。」
網民怒轟港人出國禮儀盡失：去到日本大把呢啲香港人
帖文中的最後，事主強調：「希望香港人唔好咁樣，大家去到外地都可以守規矩，講禮貌，唔好將香港聲大夾惡鬧人嘅文化帶到去其他地方。」
帖文一出引起不少迴響，不少網民都認為這位港女好失禮：「其實唔應該放佢走，好心地唔係咁用，留個犯法紀錄等佢唔洗再入境唔好有下個受害者…」、「大聲夾惡+中英文齊罵呢樣香港人絕對世一」、「去到日本大把呢啲勁失禮嘅香港人」、「如果佢真係香港人，真係失禮死人，話唔埋嗰個女仔有情緒病囉，好暴躁。」不過亦有人認為單靠服裝不像香港女生，認為可能是一場誤會。
