港人北上山姆爆買240公斤 埋單後先知送貨唔包香港
近日，女事主在Facebook專頁「香港匿名高登」發布帖文，指現時深圳的山姆超市非常有名，加上兒子在網上見到消費後可以送貨到香港，於是就一家人瘋狂掃貨，原本沒有打算購買太多：「但因為山姆買嘢是要批發咁買，即是例如我想買蛋糕，不可只買一兩件，只可以一買就要買一大盒，入面有100件蛋糕這樣。跟住買了超多嘢，十幾樣嘢，件件都大大盒，俾完錢，去找職員要求送貨，點知她說無得運送到香港。」
原來是兒子上網看錯了，而得知事件的女事主心情非常複雜：「當時我們情緒極度緊張、擔心，不快。因為我們只得三人，這些物品加加埋埋有30包8公斤的米咁重，以我們的力量根本無可能拿到、不夠力拎。」在一名女職員的指導下，他們嘗試使用微信聯絡順豐快遞，但由於不熟悉這個應用程式，他們花了很長時間才弄清楚如何操作：「要打曬每一件貨品的名稱和價格先得，仲要輸入很多個人資料和其他資料才得，打晒所有嘢已經花了2小時咁耐的時間，我和仔仔和先生已企到嚴重疲累，冇晒精神體力，很累」。
港人北上山姆爆買240公斤 歷盡「地獄7小時」！
當他們以為終於可以將貨物運送回家時，女職員卻告訴他們貨物不能過關，建議他們自行將貨物運送到「九條街咁遠」的順豐門市詢問職員，不過對方就不願借手推車，於是事主一家只能連同貨物一起走去。途中，因為不熟悉路線，花費15分鐘不斷搵路：「去到這一刻，我們的情緒真的崩潰、嚴重憂鬱、極度憤怒和擔心，冇罵職員，就這樣離開。唉！真是超超超級黑仔，冇計啦！唯有死死地氣自己搬返香港。」
事主一行人早上9點半行山姆，直到11點半，2小時的購物時間已經令大家雙腳極度疲勞，而這單意外更是令大家搞到2點半才有得食飯。過程中事主的兒子更不斷高呼好肚餓。最後大家拿著所有貨品，足足花了六、七小時才回到香港：「對腳很痛很痛，唉！真是一個超級辛苦、慘痛的經歷」
網民嘲笑事主 教2找搞掂！
帖文引起不少網民討論，認為事主沒有做好資料搜集：「山姆買咗啲嘢你可以即場退，運唔到咪退咗佢囉使乜講到咁可憐呀」、「其實搞咁多，即時搵架中港車咪可以搞掂。再唔係退貨都已經搞掂」、「貪便宜係會有教訓嘅！」、「貪平係要付出代價的，這些東西樓下超市有得賣啦！」、「講到咁慘又覺得麻煩，明明可以用7日冇理由退款規則去退貨解決晒，但又要叫慘….可能只怪30包米太平攪到你失心智…果然貧窮限制了人的理智，唉」、「無論真假, 基本上山姆免費送貨去香港通常都係非食物…..你自己睇錯就係你嘅責任啦….跟住其實如果喺山姆現場職員同你講不可以幫你送貨到香港其實可以即刻退貨退款….咁就已經搞掂」
不過亦有人質疑事件的真實性：「迷吹啦240kg。我當你天生神力又吾識攰，但係d貨咁大件，上手都上吾到啦。作得就作」、「想問下你個仔幾歲？個仔識上網睇到山姆話送貨，但又會不斷叫肚餓同扭計返屋企，之後你個仔仲可以幫手搬30包米返香港。」