樓主：十年過去 住公屋同買樓到底有咩分別？
早前，有網民於連登討論區以「十年過去 住公屋同買樓到底有咩分別？」為題發文，比較買樓以及住公屋的分別。樓主民表示，10年前為買樓而「死慳死抵」，為儲錢而犧牲去旅行等玩樂。相反，他的同學選擇在10年前開始租樓，以及排單人公屋，每年不但能去旅行，享受人生，去年一家四口終於排到一間400多呎的公屋。
他認為「好多嘢過咗年紀唔會享受得返」，而買樓最終「係益咗自己小朋友」。
樓主續表示，現時家庭月入9萬元左右，而他同學當初為排公屋，將家庭收入控制在35,000元以下。
網民：成世做樓奴 vs 財務自由+享盡福利
帖文一出，引起網民熱烈討論。有人將買樓及住公屋的分別形容為「成世做樓奴 vs 財務自由兼享盡福利」，並認為「有得使先係真贏家」，又有人指「上車之後一世玩完」。
- 「排緊公屋一年可以有六、七萬去旅行。」
- 「每年管理費差別 又會等於2次台灣旅行。」
- 「其實，有得使先係真贏家，死供爛供，無使過。」
- 「幾百萬供樓，辛苦自己幾十年。死慳死抵供樓畀下一代，不如自己使好過。」
- 「唔生小朋友一定係租屋。你死慳死抵，畀到嘅就係你仔女少奮鬥40年，可以享受人生。」
「買得到嘅通常都供到，但一上咗車，你嘅人生就係咁先。簡單啲講，係你唔供樓，可能有更大特破，供咗樓結咗婚，你就一世係咁先。」
而家買樓 退休後可以享受人生？
不過，有網民勸樓主不應該短視，就算供樓辛苦，將來退休後擁有兩層樓，同樣能夠享受人生，選擇上亦較住公屋的同學多。
- 「退休後就知啦。一開二嗰個咪舒服啲囉。公屋嗰個，儲錢睇公立醫生啦！」
- 「你試下而家同佢交換住，唔享受，仲未計你又多個單位收租，多咗現金流。」
- 「買樓當儲錢。」
- 「有私樓嘅可以50歲退休環游世界，住公屋嗰個繼續做到65歲拎生果金過活。」
「你買嗰層樓叫資產，賣返出去提早退休。住公屋，好似我呢啲住半新、大單位，每個月交6,000蚊租，要交足一世。除非係轉細單位，但要住返再舊嘅屋邨，隔離鄰里唔使我講啦。」
「點會無分別，你已經享受緊千幾呎嘅私樓，你同學只係4人家庭住緊4xx呎公屋…你層樓就係投資，老咗賣咗佢，都有大把錢退休啦！又或租出去，你哋兩公婆再去其他地方居住享受人生啦！」
私樓居住環境比公屋好？
有網民表示，就居住環境而言，私樓亦比公屋優勝，認為樓主毋須羨慕住公屋的同學。
「如果有埋小朋友，居住環境都唔同啦！淨係每日搭𨋢入面嘅人同環境都已經差好遠（明嘅就明）。你朋友用10年時間去限制自己收入或前途去換一層公屋，其實佢值得擁有一間公屋，但之後佢哋小朋友就要靠自己努力，畀小朋友怨間屋細，度過住餓你唔死，但又上唔到去嘅生活。
相反你供得起千幾呎樓，呢10年你努力無白費，份工應該都唔差，小朋友仲要有層300幾呎樓，其實你哋父母責任已完成一大半，嚟緊就等退休生活。到你退休享受嘅生活有好多選擇（賣咗層樓移民/賣咗佢套現租樓，拎筆錢去慢慢嘆），好多option，又係你朋友唔會享受到嘅。」
- 「小朋友有得享受就得啦！生個仔出嚟唔通要佢成世做低下階層，幾條友屈住間400呎公屋咩。」
- 「屋企大啲，環境好啲，一層少啲伙數，少啲機會有痴線鄰居，又唔使爭𨋢搭，住得舒服啲，家庭都和睦啲啦，仲有少啲爭廁所，2個小朋友一人一間房又會少好多磨擦。」
- 「唔係話歧視，但私樓同公屋個環境真係好大分別。細細個都唔覺，到讀U同人補習去公屋補，真係一入大堂就覺得好雜。上到樓個個都唔關門話通風，一出電梯口就對住個垃圾筒，條走廊啲燈又閃閃下又污糟，入面裝修得幾靚都無用。可能我去個啲公屋太舊先係咁，但有得揀真係唔會住公屋。」
網民：上到車嘅根本唔會供唔掂
又有網民指，供樓不等於沒有能力享受生活，皆因不少成功買樓的人，根本「唔會供唔掂」
- 「老實講，正正常常兩公婆加埋月入12萬以上，拎3萬出嚟供樓算得係咩。」
- 「唔好以為供樓就無錢剩，呢種諗法就同有錢佬賭輸場馬輸幾十萬一樣，公屋仔就覺得佢會破產一樣。呢個世界好大，唔係個個都係搵幾萬蚊靠父幹夾硬上車。」
- 「點解供樓等於無錢投資？樓、股、車位、基金，冇衝突㗎，有壓測，上到車嘅根本唔會供唔掂！」
通脹下買樓是最佳選擇？
不少人更認為，在通脹的大前提下，買資產是最好的選擇，力撐樓主10年前上車的決定，認為「買樓當儲錢」。
「你欠銀行嘅錢會隨着年月比通脹沖淡。你今日欠銀行幾百萬， 20年後睇返幾百萬唔係啲咩大錢。等於你睇返20年前同陳啟泰玩百萬富翁，畀你贏到一百萬然後儲起佢，今日都唔夠你買車位，而家喺中環求其捉個西裝友都隨時年薪唔止一百萬。
低息印銀紙年代，物價上脹銀紙貶值，第一最好係買資產，第二最好欠銀行錢（低息既話），兩樣做晒就非常好。買樓係完美嘅第一步。」
