業主屋內公家喉漏水未維修 管業處竟趁無人在家爆門入屋
林先生一家四口於2020年搬入藍田一個居屋屋苑，他指2022年8月收到管業處通知，指其家中有漏水情況，且涉及到公家喉漏水問題。到11月他再收到律師信，指管業處有權爆門入屋維修，而到了2023年6月，就被管業處在家中無人下爆門而入。「賊仔爆你門我無得講，但點解管業處會爆你門呢，我覺得好出奇，做咗幾十年人無聽過」，做裝修工程的林先生指，自己一直以來都不知屋內那來的漏水問題，自從第一次收到管業處通知後，食環署和滲水辦已上來2次進行試水，但都指找不到源頭，甚至稱「咩事都無」。
後來再收到律師信時，林先生稱聯絡過管業處，指自己年尾繁忙，希望過完年再維修，但對方無人回覆。到後來2023年3月交管理費時，他找來姓胡的主任溝通，想夾時間配合工程，但對方竟指「你拆晒個廚房我咪同你跟進」。林先生聽後感到無理，因而無再理會。
「唔理唔理，到最後畀人爆埋對門」。到2023年6月，林先生中午12時回家，發現一行幾乎10人在他門前聚集，一位姓勞的經理帶同一隊人馬爆門入屋，更鑿爛廚房幅牆。當時林先生即拍片理論，指「呢個所謂嘅管業處主任、經理，我唔知佢係唔係，就爆我隻門」、「管理處仲衰過黑社會」，對方見林生舉機拍攝，即指「你嚇鬼呀」、「我真係好驚呀，驚到手都震晒、口都震晒啊，你而家阻我執行職務，我一定告你告到底」。而據林先生所講，當時既無通知，又無警察在場，感到非常憤怒，亦非常唔合理。
管業處回應竟出現另一版本：佢最後都係唔合作
不過當節目組聯絡管業處時，對方就出現了另一個說法，指已經多次聯絡林先生，「12月我哋畀信佢，佢話新年後處理，咁我哋咪等，等到3月都過晒新年啦，再聯絡佢又話唔得閒，最後都係唔合作」。勞經理解釋，林先生屋內漏水的渠屬公家渠（即糞渠），當時他漏水到樓下單位，而滲漏的液體中亦驗出有排泄物，對住戶安危有好大影響，加上正值疫情時候，管業處一直向他表示要維修，公契亦寫明住戶要合作打開其位置供管業處維修，但依然溝通無果。
另外，他又提供2張照片，證明自己跟足手令做事，當天爆門時有2位警員在場，警方亦有向林先生解釋管業處爆門是合法行為。而林先生聽到管業處解釋後，表示「好模棱兩可」，認為「大家唔清楚咩漏，我都唔知係糞渠，無同我講過整D咩，真係唔知有無警方」。
陸大狀：證明有逼切性我情況下，爆門處理是合法
而陸偉雄大律師亦指，管業處向法庭申請手令並不容易拎到，管業處一定要證明到多次聯絡戶主，而對方一定係冥頑不靈，而糞渠正正影響全部人健康，當時還要是疫情期間，所以有一定的逼切性要爆門入屋處理。而爆門時，必需要有警方在場監管，不論事後警方有沒有離開，但開門一刻一定要有警員在場。而陸大狀亦強調，「人哋有呢個通知，戶主係應該要即時行動，唔理就係你自己理虧」。
網民：扮哂無知扮晒係受害者
網民看到訪問後，紛紛大讚管業處做得好，指「管理處做得好非常合理，第一時間處理就避免到呢啲問題，每個單位滲漏影響到人嘅時候即刻處理大家開心」、「陸大狀的解釋非常清楚，感謝東張報道無理業主的捉蟲故事」、「林生! 扮晒無知、扮晒係受害者! 以為自己無錯，實情係份人自私! 公道自在人!」、「呢條友都係做工程，好明顯知道公家喉出事，滲水辦不嬲都只係試室內私家喉同你倒完色水就算，如果係上兩三層公家喉爆一定試唔到，拖咗大半年都無反應擺明唔想比人入屋做野，有法庭手令有警察，唔好拗啦呀林生，熟行情嘅人一眼就知你玩嘢，迫到人咁串揸正嚟做」、「香港房屋水喉日久失修自然會漏水，困擾很多家庭苦主，這次法庭批准進屋維修非常正確。」、「點會有管理公司肯做咁多嘢又要爆屋呀，緊係你唔合作唔肯開門啦，仲要走出嚟X，自私精」。