$1000萬買入日出康城 朋友笑指：「比錢買垃圾崗」
最近有位網民以「住日出康城比公屋仔笑」為題，內文提到事主以千萬成交日出康城一單位，誰知被朋友指「你同堆填區啲垃圾一齊住，你買呢層樓同垃圾冇分別，地鐵又得10分鐘一班」；相反住公屋會令家庭關係更好，「無房啲兄弟姐妹關係親密啲，屋企長期可以打開門通風，同鄰居又好相處，租金又便一大截」，事主曾反駁指手持物業價值過千萬，但朋友依舊取笑他令其感自卑。
此論一出，引來網民力數日出康城缺點，指「又濕又遠又垃圾區，扮貴價地段」、「你真係住喺啲垃圾上面喎」、「將軍澳區樓期潮濕，老咗仲慘周身痛」、「用成千萬買康城，買出面屋仔好過啦」、「搭地鐵等勁耐一班，住元洲邨出到港島，你都未離問將軍澳」、「起樓密度仲高過公屋，直頭係窮人版私樓」。
網民數4區公屋完勝中產地段
-
長沙灣
有四小龍之稱的長沙灣，近年開設了不少「明星Cafe」吸引一眾年青人特意到訪，有網民大讚長沙灣區發展越來越好，媲美中產地段期。
網民：「長沙灣站上面啲公屋真係力壓康城，四通八達，市區食飯購物方便，平租，唔會聞到垃圾味」、「海麗邨仲有海景望，重點係租金都係幾千蚊」。
-
啟德
啟德作為新發展區，地理環境曾被視為黃金地段，區內住宅地段持續發展，不論公共房屋、私人樓宇、大型商場亦表示將陸續登場，不少人曾渴望能抽中啟德公屋單位。
網民：「啟德呎價都唔平㗎，2萬幾3萬一呎，住嗰邊公屋已經正過康城啦，又有海，喺正個新嘅地鐵站側邊，班次實密過康城，仲要係九龍區去邊都方便」，更指「唔笑你買康城唔通笑邊個？」
-
彩虹
以往彩虹區一直是大家打卡熱點，但原來附近亦有多間Band 1中學，以校網而言相當不俗！有網民更大讚其居住條件比其他私人樓宇更好。
網民：「彩虹啲公屋個景靚到，走廊大堂又寬敞企理，個環境真係正過唔少私樓，仲要無康城咁密密麻麻，住都住得舒服啲」。
-
元朗
元朗一向被喻為尋找平價美食之地，網民指要望山景不用選擇港島區，元朗價錢「平一大截有大大個山景」。
網民：「元朗西鐵好方便，返尖沙咀同中環仲快過將軍澳，環境又綠化又有大自然，密度低又見到個天，夜晚仲見到星星」，「日出康城無呢啲㗎啦，淨係聞垃圾味同潮濕天個陣抹地都有排你受」。
