Stream B移民港人遭歧視
「糖記甜品」一間位於加拿大安大略省（Ontario）的分店，早前刊登了一則簡體中文的招聘廣告，當中寫到會聘請三個職位，分別是服務員、吧台及後廚，上班時間由晚上7時到凌晨2時，時薪為加拿大政府規定的最低工資，每小時15.5加幣（約92港幣）再加小費，當中更寫了一句「香港來的新移民Stream B或者暑期工，請勿擾」，圖片在周一（24/7）廣泛流傳並辣㷫網民，直指廣告涉嫌歧視。
歧視行為引爆公關災難
這則廣告演變成公關災難，根據官方資料，創立於2010年的「糖記甜品」稱公司是「年輕復合式甜品品牌」，又以「新派港式甜品」為主題，一班香港網民睇完之後嬲多幾錢重，怒斥港式店居然唔請香港人。「糖記甜品」得悉事件後，同日就在Facebook發布告示道歉，認為「招聘廣告為個別分店行為，絕對不能代表我哋團隊或者糖記甜品，我哋絕對不能容忍任何傷害和歧視香港人的言論和行為。」又表示招聘廣告在發布前未經審核，店家確實有不可推卸的責任，現時已經移除招聘帖文，又指已對涉事員工作出嚴厲處分。
移民港人做錯一件事被討厭
翌日（25/7）早上「糖記甜品」再為事件道歉，指涉事的分店經理已被即時解僱，又表示：「我們大部分人曾經（現在）都是這個地方的「新移民」」因此深深明白職場平等的重要性，不過網民就仍然唔接受道歉。而當地港人黃麗文（Fiona Yellow）為此去信加拿大人權委員會指違法人權法，而涉事被解僱的經理Nikki就找到黃麗文，並在黃麗文的Facebook直播澄清及解釋事件。
Nikki分享拒絕聘請經Stream B移民的港人，原因是過去有不少以Stream B移民的港人唔捱得，認為工作太辛苦便辭職：「我和同事要花心機、時間、人力去訓練他們……但他們話辛苦做唔到，做兩日就唔做；他們冇心付出，似消磨時間，教佢地又唔聽……不止一兩個，係十幾個都係咁，否則唔會咁寫。」Nikki透露自己在廣東出生，但是十歲已經出國到阿根廷生活，並不關心政治，又表示老闆也是香港人，曾經向她講到：「幫得就幫」因此她對於這次的事件感到內疚：「好對唔住公司，我做咗6年，老闆對我好好，全權交俾我管理店舖，老闆完全不知道（招聘廣告內容）」
不過網民就不太接受Nikki的說法，紛紛留言說到：「作為一個移民咗加拿大三十幾年嘅香港人，睇到你哋嘅招聘廣告，除咗『憤怒』就只有『憤怒』。我哋好多人係移民，亦曾經係新移民。當他們最需要幫助的時候你卻落井下石。」、「歧視香港人嘅店舖，唔好再扮乜嘢香港味道啦！」、「如果糖記歧視嘅係黑人、印度人或拉丁裔，應該已經被起訴，經理只係代罪羊，唐記根本無悔意，被杯葛係究由自取」、「你歧視係不變事實，唔好扮慘扮喊嚟博同情，你喺外國咁多年會唔知道歧視係一種罪行嗎？最重要係你出Po 請人嘅時候，內容係經過深思熟慮先出，所以唔好再扮嘢。」、「頭先講自己好少留意世界，其實咪話緊畀全世界知你自己有幾無知。好坦白講，你估見工所有人都會請嘅咩？老闆或interviewer心裡都有請人準則，但礙於怕被人話歧視，一般都唔會寫晒自己的準則出來。這是好common，。真心覺得老闆炒你炒得啱，你的無知係累埋公司。」。