撰文：SY｜圖片來源：Facebook@生仔要考牌系列
有一網民在Facebook「生仔要考牌系列」講述自己一次返工坐港鐵經歷，事主因為在家照顧小朋友，上班感到很累，所以坐車時就選擇坐在關愛座旁邊的普通座位。當列車到尖東站時，看到有一家4口上車，其中媽媽拖住目測約10歲女童，說法文的爸爸推著BB車。
而該媽媽一上車就指住事主：「呢度係關愛座，唔該你起身俾我個女坐」。坐在普通座位的事主很疑惑，明明自己坐的不是關愛座。當時，一位普通位的乘客就讓了座位給母女二人一齊坐，而事主看到母女都坐下了，就沒有理會。
接著，該媽媽對著自己的小朋友說：「呢度成行都係priority seats（關愛座）嚟㗎，係for children，not for adults（小朋友的，不是成人坐的）。」事主聽到忍唔住說：「其實關愛座只係最側邊嗰兩個，其他嘅都係普通位」。然後媽媽就指：「呢度成行都係priority seats，係俾小朋友，唔係俾你坐㗎！」
最後事主：「Sorry，呢個真係唔係關愛座。再講，其實任何人有俾錢搭車嘅，都有權去坐每一個位置，唔係剩係俾你個咁大個嘅女女！」最後因為列車到站，事主就沒有再說下去，剛想下車就被該媽媽的法文丈夫擋住去路，不讓其下車。
最後事主在Facebook帖文上指：「如果關愛座真係只准小朋友坐，咁老、弱、傷殘、孕婦係咪唔使坐？」事主認為，看外表有時真的不會知道對方有沒有傷患病痛，「讓係人情，唔讓係道理」「如果你真係要你小朋友出街都有位坐嘅，煩請你去call的士」。
而帖文在Facebook「生仔要考牌系列」一出，事主得到很多人支持：「其實小朋友係唔需要一定坐特別小學以上（除非唔舒服或者行動不便）我囡囡四歲一樣企位由藍田企到旺角，如果想有位都係果句：請搭的士」、「個女已10歲大阿媽仲理直氣壯要人讓座，個老豆仲要唔俾人落車，真心為呢對缺乏父母正確身教嘅小朋友感到悲哀⋯⋯⋯」、「就算係關愛座都好，幾時有講過係小朋友專用?」、「就算我坐既係批鬥座，我係唔讓，又如何？！」
更有網民講述自己經歷：「有次經痛見到得關愛座有位，頂唔順唯有坐，點知有個阿婆中氣中足，聲大夾惡咁鬧我冇家教，關愛座係比老人家坐，你坐咩鬼」、「我試過跛左隻腳著住個腳套，無人讓位都係小事。坐係關愛坐都比人叫我起身」。
