港女為準備聖誕節欲駁髮扮靚 結果「頭髮沒了、錢沒了」
港人興起反向代購，想不到連駁髮都要「反向」。一名姓黃的小姐近日找《東張西望》訴冤，指自己早前透過抖音看到大量駁髮宣傳，看到那些帖文的駁髮效果相當漂亮，加上聲稱可赴港上門駁髮，因而被吸引到。她指，「我自己加咗髮型師微訊了解，指$2,380包駁3紮數量、染、剪都包埋，仲專程問係咪港幣，佢答係」。而對方聯絡時，從沒交代上門駁髮會安排3個人過來上門，當天問到該名髮型師時，對方指一名是朋友，一名是徒弟。「佢哋嚟到一整就知好唔專業，染髮都無帶齊功具，洗頭水都要問我借」，加上一心以為會是一向聯絡的髮型師親自出手，豈料貨不對辦。
原本傾好$2,380 「洗濕個頭」後又變$4,800
「佢個朋友言談之間透露個駁髮師得21歲，但網上明明自稱有8年經驗」，21歲有8年經驗，即13歲就開始替人駁髮？黃小姐指當時心生懷疑，但由於已「洗濕個頭」，因而只好繼續相信。惟駁髮中途，對方突稱「你個頭要$4,000先駁到豐滿效果，共要駁4紮頭髮」，黃小姐因而答應，但當結帳時，對方竟稱總共要$4,800，並指「呢個係人民幣價，港幣係5千幾」。當刻黃小姐才發現，原來該名21歲駁髮師擅自「再加多紮」，「我無諗過要5紮，佢同我講總數係要呢個價，你要比1千蚊現金我，方便我一陣留喺香港玩」。
節目組放蛇問價 對頭人：唔使簽證㗎呢啲
而節目組事後扮客人找同一間店查詢，問到簽證如何處理時，對方即心虛，指「唔使簽證，我有理髮師工作證」，更一時指自己由靠近深圳的地方來港，一時又指自己在元朗有理髮店，前言不對後語，更不斷「Dead Air」，一句起兩句止，相當模糊。而主持Lucy透過視像與對方對話，可見到一名不願出樣的男子，而背景是全簡體字的路牌，人根本不在香港。而對方最搞笑的是談及到這種交易沒有問題，稱「而家反向帶貨D人都係咁收費，唔使簽證」。
律師：其實係等同請黑工
但問到黃小姐的個案時，他即堅定地表示「我緊係唔會呃人，睇你選擇，佢頭髮要曲，嗰啲係錢，佢髮量唔夠，都要加！」黃小姐任人劏都算，駁髮後髮量更多到無法洗頭，一星期後更自己拆走所有駁髮。而最得人驚的是，其實黃小姐用這種途徑請人來港上門駁髮，其實同請黑工無異。陸大狀指「係有機會犯法，你叫人落嚟提供呢啲服務，等同協助教唆他人違法逗留條件，變相做黑工，一經定罪要罰款5萬及入獄兩年」。
網民：個女人天才定白痴？
網民看到事主訴苦的情況後，紛指「真係返得多去都無D思考能力」，認為「自己都識講同香港差唔多價錢，咁點解仲要幫襯大陸人，貪自己未畀人呃過？」、「根本就係貪佢平，一個女仔，都唔想自身安全，三個人上來，都給上門，白痴定天才」、「on居無極限，貪平都算，三個陌生人入你屋企都肯制？」、「香港大把髮型屋，只講一句，無腦兼自己攞嚟衰」、「而家啲人面皮厚得緊要，自己犯法仲好意思上東張投訴對方」、「2千幾香港都做到啦一係就去大陸舖整，比陌生人入屋溶左都唔知咩事」、「一聽抖音就知出事啦，低能」。
