到朋友屋企打邊爐被要求夾錢 港女怒斥：小家兼肉酸！
早前一名港女於Baby Kingdom上發文，怒轟一名朋友的行為小家而且肉酸。事緣她有一名居於新界偏遠地區的朋友邀請她到家中打邊爐，不過對方在購買食材後卻表明要「夾食材錢」，令她大感愕然，同時更指朋友講到出口的行為「有啲肉酸」，表示如果是自己主動邀請朋友上門聚會的話，會不好意思叫朋友夾錢。
請人去自己家食飯，人哋話買嘢上嚟都會話唔使，做唔出邀請人又要人夾返錢……如果主動請人又要人夾，我覺得都幾小家，我自己會唔好意思。
另外她也提到由於朋友們早就約好時間，獲邀人數亦不多，如果自己臨時缺席的話或導致朋友無法打邊爐，所以對於夾錢一事感到十分不滿的她也不好意思「放飛機」。她亦強調今次是她首次遇到主人家「開聲要夾錢」，直言自己感覺到對方比起朋友相聚時間，更注重金錢。同時亦指出該名友人為人計較，預估對方必定會刻意買過量食材：「佢話會買晒所有嘢，我估應該都會買過量，因佢份人都計較。」
網民恥笑：唔好成日想攞着數！
帖文引來網民熱議，不過不同意事主的意見佔大多數。不少人都指出她想食「免費飯」，指出對方願意提供場地予朋友們聚會，事後還要清潔餐具及地方，並非老奉要請客！同時亦提醒她「請妳係人情，唔請係道理」：
【你走咗大把後續嘢要搞喎……】「食飯夾錢好正常。人哋招呼你你估唔洗做，你走咗之後仲有大把手尾。你係咪同人洗晒啲碗抺埋個地先！」
【掛住攞着數】「應該夾錢喎 AA制最好，大家不拖不欠，公道！人頭計，唔好成日想攞着數」
【少少豉油都唔出？計較嗰個係你】「夾錢係應該囉，就算唔同你計，你都唔係奉旨兩手空空咁去人哋到呀？至少都買下生果甜品嘢飲，係人哋度都人哋未必要你洗碗執嘢，人哋準備好晒俾你嚟食，你點都要有少少貢獻呀，人哋都出咗雞啦，少少豉油你都唔出，計較嗰個係你囉！」
【見朋友傾計定想呃餐飯？】「大家都有負擔，點解要別人請呢？人哋就算有錢啲，都唔一定要人哋請，夾錢食自己都食得開心啲！同埋唔夾錢，正常都會買嘢上去，可能仲貴過夾錢。約出嚟見面唔係為咗見下傾吓心事㗎咩？諗住有餐食就算？奇怪」
其實主人家開口要求夾錢都唔係好肉酸啫，有份食就俾返份，唔係正常咩？相反介意主人家叫你夾錢，你咪唔好嚟囉，話人肉酸，其實最肉酸係你自己，又要介意、又要顧慮、又要唔想出錢…一係你請人去自己屋企食飯、聚餐，你唔使人夾錢都得…定係就係你自己唔想請人上門食飯聚吓，所以人哋請你去人哋度食飯就大安旨意諗住唔使出錢？到底邊個更肉酸呀！？
有人支持事主：真係有人會cheap到買過量食材要人夾錢！
當然亦有網民認同事主的意見，認為是朋友主動邀請用餐，就理應付全款：「我自己都係，請人去自己家食飯，人哋話買嘢上嚟都會話唔使，做唔出邀請人又要人夾返錢」。有網民更分享類似經驗指，曾指被朋友多次邀請自己上門食飯，結果對方故意採購過量食材，事後更要求夾錢：「故意叫過量，又夾起畀老公又夾起留明天自己食，條數又要大家分！」
