樓主：次次食lunch同放工之後都搵唔到班00後
日前，有位打工仔於香港討論區以「班00後新人一放工就搵唔到佢哋，到底仲有冇責任心？？」為題發文，大呻帶00後新人的不滿。那位打工仔指，公司每年都會要求他帶新人，講解公司運作。00後新人返工1個月左右，他卻發現一個嚴重問題，想向HR反映：
「次次食lunch同放工之後都搵唔到佢哋，Email又好，WhatsApp又好，佢哋都唔會即時應，點都係返到公司先會應。咁我搵得佢哋都都係緊要嘢，點可以唔應機？𠵱家科技咁發達，覆Email同WhatsApp都唔難，做嘢又方便，都唔明佢哋點諗。考慮緊同唔同HR講呢個問題。」
有人指00後唔使養家糊口 自然任性？
樓主帖文一出，引起網民兩極反應。有人認同樓主的觀點，直言00後無生存壓力、分分鐘零用錢比人工還多，自然任性兼無責任感。
- 「00後又唔使養家糊口，無生存壓力，自然任性。」
- 「心態就係打份工，工作時間外無責任。而且個個都懷才不遇，打份工已經好屈就，可唔可以體諒一下年輕人。」
- 「一代不如一代。」
- 「00後啲零用錢仲多過份人工，點會認真做。」
網民勸樓主：對00後不能要求太多
又有網民勸樓主「睇開啲」，對00後不能要求太多，要不然只會令自己心煩。
- 「我公司嗰幾件都係咁，講完都無用。做咗幾日之後又會打回原形。」
- 「𠵱家啲人係咁，你唔放開啲只有激死你。睇開啲啦兄弟。」
- 「佢哋無造反已經偷笑，對00後不能要求太多！」
網民：並非00後問題
不過，有網民認為樓主不應將00後標籤化，問題出自人人對工作的態度不同，就算是70後、80後，同樣會有一樣的情況。
- 「錯， 並非00後的問題，而係你公司文化的問題。Lunch同收工後屬於私人時間，如果好重要事情，就打電話啦！」
- 「我公司啲『老屎忽』一樣都會無影，唔關年齡事，係嗰人有無心嘅問題。」
- 「佢哋人工幾多先？低嘅話好正常！有咩事咁急一定要食飯時間內要知答案？問題唔可以收工前問？自己無時間觀念就話人哋無責任心；我想講，好多70後、80後都咁啦，返工出去hea，收工第一個走。」
有人反指樓主要求不合理：放工應你係人情 唔應你係道理
雖然有部分網民認同樓主觀點，但亦有人認為為00後新人的做法並無不妥，反指樓主的要求不合理。有人認為，收工後屬私人時間不回覆訊息、電郵合理。更有人直言，收工覆同事訊息是人情，不處理公事是道理。
- 「你份工係咩工先？Lunch or 放工係我自由時間，一定要覆你？我會照睇message，不過睇情況先覆。ps：不是00後」
- 「事實上…收咗工都仲應上司/同事係人情，唔處理公事係道理…與期埋怨收工唔覆，不如諗下點樣可以喺office hour 安排好曬所有嘢。」
- 「我80後，但認為放工就放工，除非好緊急情況，否則點解要即刻覆，隨時要求別人非辦工時間做嘢，呢啲叫剝削，我唔係後生但我都唔認同呢種理所當然的要求，尤其對人工唔高的一般打工仔。工作是工作，生活是生活。」
- 「Work life balance，你明唔明㗎？」
- 「用私人時間去理你公司嘢？除非同你好熟好啱傾啦！咁如果調轉用公司時間做私人嘢！公司又得唔得先？」
科技發達唔等於打工仔要24小時stand by
亦網民指樓主的觀念太古板，認為「以前無智能電話一樣第二日返到公司先處理，科技發達咗唔代表員工24小時stand by。」又有網民認為樓主應將心比己，人人都有休息時間，放工時間覆訊息並非評定員工是否有責任心的標準。
「如果我係你下屬，我會半夜四點搵你傾公事，你唔覆就係你無責任感。我會去同HR講你唔適合教人，係咪要咁樣先顯得你有價值？做人可唔可以將心比心，工人都有休息時間啦，返工使唔使畀埋條命你？
做嘢有無責任感唔係咁分，平時辦公時間內都睇得出啦…換轉你放大假去旅行，都唔想老闆搵你啦！」
網民：公司唔加人工就不要怨天尤人
有網民笑言，樓主想令00後對工作上心，收工後覆message，最佳的做法莫過於是加人工、OT錢。
- 「同老細建議，放工時間後有公司嘢要WhatsApp傾的話，可以同老闆claim OT錢！佢哋會樂意即刻回覆你的！」
- 「沒有事係double人工解決唔到，如果有就triple。錢一夠，佢留埋公司過夜，24小時聽電話都得。如果無錢解決，就係公司太窮嘅問題，不要怨天由人。試下從好方面諗，員工出一份咁低人工，只係想幫公司慳錢。」
