打工仔claim錢失敗原因勁搞笑 會計部同事香港地名夾硬譯
呢位打工仔近日於「奴工處」專頁投稿， 由於早幾日需要搭的士上山頂送貨， 所以需要向公司claim錢，但公司同事竟然「打落嚟問究竟係邊個山」， 因為全香港只有一個山頂，搞到樓主成頭黑人問號， 追問下才發現原來小額現金會計部同事在申報表打上「the top of the mountain」而唔係「The Peak」， 才會造成這樣的誤會， 都唔知好嬲定好笑！
網民：佢邊度鄉下？
原來「騎呢同事」非常常見，樓主分享後引起網民同感及回應，一起分享公司的奇人趣聞！例如有不熟悉香港英文街道名稱的同事，見到英文地址只能夠用Google翻譯，例如Wood Road（活道）譯成「木頭道」，Leighton Lane（禮頓道）譯成「牧場道」；又有同事出差到英國，「扮公」期間到大笨鐘觀光，但竟然同的士司機講要去「stupid clock」，可謂醜出國際！
但原來mountain 有高度限制，海拔600米以下又沒有拔尖山頂其實一概稱為丘陵（Hill），太平山山頂高552米，嚴格來說不能稱為山。有熟悉香港的網民則指出其實山頂字義字面上亦非常含糊， 太平山亦有多個山峰，而樓主所指地方全名應為扯旗山爐峰峽；更有網民找出1985年政府地圖， 列明山頂除了「The Peak」之外，Shan Teng 作為音譯亦是可接受的英文名，總而言之連音譯英文都比「the top of the mountain」強！ 正因為咁有網民懷疑呢位會計部同事並非香港長大， 如果唔係小學時英文堂已經有教地方英文名，不知道「山頂」英文名的確強差人意。
資料來源：FB@奴工處
