屋企維修害死貓 主人：我害死咗我隻貓
昨日（9月20日）晚上有一位貓飼主於Facebook群組「天下貓貓一樣貓群組」發文，帖文第一句就寫上「我害死咗我隻貓」，吸引了大批貓奴目光。事主娓娓道出事件經過，事緣她屋企冷氣機漏水，導致外牆發黑，「執修部嚟咗5-6次都整唔好」，但因為該間房間本身本身無人住，所以執修部師傅就算維修用了頗長的時間，事主亦沒有埋怨。
事發當日執修部再次上到她家中維修，她向師傅表示懷疑是裝機位置有問題，但師傅則堅持為喉管問題。而她家中有3隻貓貓與2位兩歲的小朋友，而師傅維修大約20分鐘後就表示要落樓拎工具，事主就順便帶咗仔仔出露台，「廢事我仔仔搞佢哋啲工具」。
師傅突然油油 主人：無經過我同意！
大概20分鐘後，師傅再次到場維修，事主就到露台陪伴仔仔。過了不久她再次回到家中，突然有一陣十分刺鼻的氣味傳入她的鼻中，她立即開窗、開抽氣扇、開露台門散味。之後她步入房間內，赫然見到師傅「拎住桶嘢……喺到油緊我啲牆」！事主坦言師傅「事先絕無經過我同意，我亦唔明點解冷氣喉壞咗佢哋要油油」。
人貓天人永隔 主人極為自責：已向屋苑投訴及報警處理
在她離開屋企上班之前，她有檢查過貓貓無任何問題，而家中除了貓外，還有爺爺與2位仔仔在家中。到她下午5點放工回到家中，突然發現一隻只有4-5歲、一向身體健康的貓貓已斷氣。她即時帶貓貓到獸醫中心，可惜搶救無效。獸醫問到「你屋企係咪裝修過嚟」令她十分自責，同時表示「原諒唔到我自己，我已經向屋苑投訴及報警處理」。
網民同情：唔好自責啦！
起初大批貓奴網民見到她的帖文都感到十分惋惜，紛紛安慰她：「唔好自責啦，你都唔想發生嘅」、「唔關你事，係佢哋油油之前冇問過你，不必自責」、「替你難過，別再責怪自己，沒有人想這樣的，不是你的錯」、「支持你追究，但樓主唔好太自責take care」、「唔好咁自責內疚，明白你會覺得係自己嘅責任，但不要太難過！」
亦有貓奴網民分享親身經歷：
之前屋企有白蟻
跟住有人嚟整我都話咗一定唔可以噴藥
之後師傅唔理係咁噴
佢話啲藥淨係對昆蟲有害
跟住我好大聲尖叫我話「你唔好再噴啦！！！！！！」
事主前言不對後語 網上風向大反轉
但就在網民紛紛同情她與貓貓的遭遇時，事主在其中一個留言回覆到：
其實知道佢地嚟會上嚟前，貓貓已經入咗隔離房….同埋佢地早喺一個月第一次嚟之前，佢地話整好返個喉之後，會幫我油返個牆…所以我一早已經同我媽講咗會去佢到住一段日子，我係無諗過佢未整好個喉就油油上去。
事主這前言不對後語的回覆一出，就即時引爆網民們的怒火！
【指控事主推卸責任】「其實人哋真係冇責任要照顧你隻貓，照顧你隻貓嘅責任係你自己！再講一次，係你！自！己！你投訴乜嘢屋苑啫？！你又話牆滲水滲到黑晒，咁維修部梗係幫你做防水維修啦，就係咁簡單，如果唔係做漏嘢一陣又係俾你投訴。你自己唔留意細節，就將責任推卸落人哋嗰度，我建議你呢世人以後唔好再養寵物啦，否則下一次你屋企唔知發生乜嘢問題，又係將責任推卸落人哋嗰度，慘劇只會再次出現。」
【點出事主全程無出聲】「好心啦，識得講係自己害死隻貓仲打算去投訴冷氣師傅。唔好問點解會無啦啦油油，維修期間你全程喺屋企無出聲喎，當個師傅真係有問題原來接錯order做錯job，個問題都係你知道油油唔識得保護啲貓，到有朝一日你屋企油油隻貓都係死梗，咁個責任係咪係你到而唔係師傅到？」
【指事主無阻止師傅】「師傅都係聽order做事，師父唔會無啦啦過去油油，仲要屋內係有戶主喺度，有問題冇即時阻止、反映！」
【認為事主完全沒有自責】「其實你只係想開post取暖，第一句就話自己害死貓，但最終係將個責任比晒個裝修師傅，完全感覺唔到你嘅自責，只感覺到你推卸責任。」
【無即時檢查為飼主過失】「聞到有味即係貓貓都聞到，唔第一時間帶佢哋去診所檢查係你自己過失！」
【毫無危機意識】「要返工都臨時請假啦，自己一啲危機意識都無，仲諗住委過於人，貓貓有你咁既主人真係慘，愈睇愈嬲！」
【鬧爆事主不宜再養動物】「看了全段文字，我認為你不宜再養動物！根本做人態度也有問題！單位冷氣機漏水，師傅上來執漏維修，師傅跟order做完就走，你當時在場理應將家中小孩和寵物帶離維修位置！現在貓死了就推卸責任給他人，毫無道理！」
而事主也在風向反轉後潛水，暫未有上水回應網民指控。
