婚禮司儀「炒車」實錄
「司儀」確係一個專業嚟㗎！最近就有網民喺討論區發起「一人一個婚禮司儀黐咗線嘅一刻」，將自己喺婚禮上遇過最尷尬嘅情況羅列出嚟，有啲都真係幾大吉利是㗎！
自high系列
「司儀係一男一女外面請，冇人識，無啦啦去到中間，男司儀話個女司儀今日生日，要全世界陪佢唱生日歌 + 畀驚喜個女司儀！」
「司儀講講吓嘢講到喊晒，然後話原來個新娘係佢鍾意咗好多年嘅女神，然後無啦啦大叫咩『哈利路亞 CHANCE』！」
MC:「我叫 Martin 佢叫 Candy，所以我哋係MC！」
「新人同家人親戚朋友影相，影影吓，個MC嗌：『而家有請MC上台影相！』，然後自己衝上台」
「個司儀玩到無嘢好玩，無啦啦叫我老豆咀我老婆個老母，下面班XX仲大大聲叫咀佢！咀佢！搞到我外父同我老母黑曬面 !!!」
開口夾着脷系列
「切蛋糕既時候，MC:『我地祝對新人由頭切到尾』，婚宴完嘅時候，MC:『我哋下次再見』」
MC:「新郎都無得食新娘隻豬，大家就有得食乳豬」
MC:「新郎依家可以揭起新娘嘅婚紗」
「親戚係茶樓擺左十零圍，有個駐場大嬸司儀：『雖然今晚圍數唔多，但我地都用最熱烈既掌聲歡迎一對新人』」
MC:「恭喜一對新人走上呢條不歸路………er……..幸福之路!!」
大吉利是系列
MC:「我哋一齊睇番一對新人生前嘅片段」
「試過個 MC 叫: 『有請女家外母慈雲閣嘅鄰居』，外母住慈雲山啲屋村，但係慈雲閣係放骨灰果啲寺」
「試過去飲，新郎新娘多謝完四大長老之後，MC話: 『多謝完就要有啲表示啦，我地而家請新郎新娘向父母三鞠躬致謝』，新郎新娘又真係照做，四大長老塊面黑到！」
睇完以上嘅炒車經歷，令人更加明白請個可靠婚禮司儀嘅重要性！大家將來結婚嘅時候，記得「帶眼」搵司儀喇！祝大家有個浪漫又美好的婚禮。