大埔菜檔疑疫市變陣出售碎上蔬菜
有網民於Facebook群組「大埔 TAI PO」發文，上載了2張在菜檔拍攝的相片，並詢問到「有冇見菜檔咁賣菜？#碎上」。從相片可見，區內有菜檔將西芹、紅蘿蔔、南瓜、茄子、粟米等蔬菜切粒、切段並用保鮮袋包好，以$30 – $50一包出售。
帖文引來不少網民熱議，有網民表示：「咁好服務嘅」、「正喎！唔駛切」、「有時斬南瓜斬到手痛」、「惠康個啲蔬菜包咪又係咁，有咩咁出奇」、「其實都係商機呀，有生意頭腦！有啲蔬菜切左未洗水又包得乾淨企理其實都放到幾日甚至一星期，貴少少但慳水慳力我會考慮」、「其實買得過，驟眼睇佢一包都有2斤」、「點解切碎去？咪多重功夫？幫手賣貨補貨好啦」。
有人質疑為什麼菜檔要將蔬菜切粒、切段，有知道原因的網民就解釋到：「因為餐廳停業唔拎貨」、「明顯廚房料嚟」、「原本交酒樓食肆嘅貨嚟」、「本來交貨給餐廳或酒樓，已先切好，省卻功夫，係食店才會這樣做。應該係啲酒樓突然間關門，取消晒啲單，所以將切好嘅菜拎出嚟賣埋佢」。
亦有網民懷疑是菜檔將「唔靚仔」的蔬菜切好出售，以魚目混珠。網民指：「有啲菜檔好古惑，將爛嘅部分切走，其它切好再賣。所以非必要都唔好買，唔新鮮」、「擺到爛左……切走既爛既賣咪靚靚仔仔」、「如果啲西芹未刨走啲纖維，真係唔該晒」。
