港女到國泰招聘日見工：要喺屋企人朋友面前威返次
早前國泰航空舉行了招聘日，吸引了幾十名求職者到場應徵。Facebook專頁「奴工處」就收到一份投稿，投稿人表示自己去了國泰航空的招聘日見工，她直言自己因為經濟、市道等大環境因素，對人工多寡不抱任何期望，只求可以成功應聘國泰。同時她也表示：「仲有如果我入到去做的話，肯定可以同屋企人朋友威返次。」
港女為成功應聘國泰胡說八道：就算要倒貼我都做！
為了增加成功應聘機率，她嘗試即場對面試考官表示「就算免費甚至倒貼自己積蓄都冇所謂」，但她這樣的一番言論並無成功打動考官，最後還是沒有成功應聘。
事後她坦言：
唉都唔知呢世做錯咩，明明已經唔要求高人工，咁都唔肯俾我試吓⋯
係都要對我趕盡殺絕真係好無言！
有時真係懷疑自己究竟係咪同間公司有仇，係都要趕絕到我呢個地步
港女坐定粒六已辭職感懊悔
本來十拿九穩的她一早就向舊公司辭職，劈炮唔撈時更向屋企人與朋友明言可以做到國泰的員工，坐定粒六的她更早就po定Instagram報喜。現在面對沒有成功應聘國泰航空任何職位，「依家搞到兩頭唔到岸都唔知點算好」。
網民恥笑：做咩要請個傻嘅返嚟？
投稿公開後，瞬間引起大批網民熱議。大批網民眼見她的如此「奇特」的言論，都紛紛恥笑：「話倒貼都制嘅一定唔會請啦，做咩要請個傻嘅返嚟」、「一日未過試用期都唔會出聲，你仲大鑼大鼓周圍講仲辭埋職，當買個教訓囉」、「出左offer簽好contract都可以轉頭話唔請，樓主憑乜嘢咁有自信，坐定粒六人哋一定請呢？」同時亦有人以食飯來比喻她為什麼未能成功應聘國泰，十分精警：「有budget時係想人介紹我食啲好啲嘅嘢，唔係平啲嘅嘢。」
空姐工作並不美好 $9,000底薪做空中侍應有幾威？
同時因為國泰被爆空姐、空少的底薪只有每月$9,000，部分網民就指出其實做國泰空姐也沒有想像中的美好：「打份工原來係要攞威，仲要倒貼咁卑微有幾威？乜原來有人有咁嘅諗法，唔怪之得底薪$9,000都咁有競爭力」、「呢個年代做空中侍應有幾威呀？全香港都知得$9,000底薪，每年裁員，跟住加薪加得少又要罷工」。
網民分享見工經驗
不過也有網民分享自己見工經驗：「我試過去見一份工，in果時話請我，之後體檢，驗埋尿，到最後咪冇回覆，最搞笑係2年後打俾我，問我有冇興趣去做另一個POST」、「我有個offer等緊manager head final approval，就嚟第4年了。」
醒目網民懷疑投稿實為膠post
不過因為這位投稿人的文筆與另一個早前在一夜間消失的Secert專頁，當中某位投稿人的文筆十分相似，所以被部分網民懷疑此post實為膠post / 潮文，不少人都笑言「零分重作」、「派膠唔該去硬膠谷」。
