打工仔拎完Bonus即日辭職 同事竟睇唔過眼「教精」對方
該網民於討論區發文，指「嗰朝見佢（同事）話出咗bonus，話等咗好耐乜乜物物，原來係要走，做到咁明顯會唔會有手尾？打工就唔應該係咁，過一排先辭唔好整臭自己個朵」。
相關言論，隨即惹來熱議，不少人表示「攞返自己應得嗰份點解有問題」、「有咩問題，大把人係咁做」、「之前嗰12個月畀公司使到盡，係勞力嘅一部份，拖咗12個月終於出糧」、「會有咩手尾，出糧係應份，辭職個人決定」。
老海鮮上身反擊：太明顯好難睇
而當事主看到網民的反應後，即回應指「個問題咪就係太明顯，好難睇，未見過咁癲，真係一見到入咗數就遞，一刻都冇delay，其他人反應係：下⋯⋯」。
網民：不如擺返圍和頭酒先辭工
網民指「唔係呃唔係偷唔係搶，真正憑自己實力拎返嚟，有咩唔啱？」、「你做慣黎生先覺得有問題，人哋尊重合約精神」、「想當年我都係咁，上午收到錢，下午辭職，𠴱日仲要係Christmas party ，完咗特登叫老細咪走住」、「你應該係日日OT唔敢準時走，唔請sick leave嘅奴隸嚟，又話後生唔識感恩」、「其實出完bonus走難睇；出完糧走都係難睇。臨過年走難睇；通知期疊住紅日又難睇。peak season走掉低公司難睇；low season走hea住出多一個月糧又難睇，諗諗吓真係覺得對公司唔住，不如賠返十萬八萬畀老細再擺返圍和頭酒先辭工？」、「同你有親啊？」。
