凍檸茶無檸檬 失卻傳統港式茶餐廳特色
有人話香港人對凍檸茶中的檸檬好似有仇般死篤爛篤，愈篤得用力就代表香港人身份認證愈強，不過有網民近日在「將軍澳主場」討論區內開帖投訴「好似越嚟越多餐廳檸茶檸水用沖劑，即係杯飲品無檸檬、無茶」，帖文一出即引起網民熱議，直指有多個連鎖茶餐廳集團早已使用沖劑來取代傳統茶記檸茶，有人嫌棄沖劑檸茶超級難飲「啲味好似洗潔精咁，飲左一啖就想嘔」、「太少水就好杰一pat，太多水又稀又淡，最緊要係無茶味」、 「完全無得控制，勁酸」，更甚者有網民懷疑「這類化學飲品不知添加了幾多種有害物質」，「茶記檸檬茶冇檸檬，我去買包維他飲唔好」，對於沖劑檸茶極盡嫌棄。
檸檬榨汁變沖劑 偷工減料省成本
百物騰貴下，檸檬茶中的檸檬賣少見少，由4片到3片、厚切變薄切，到現在更有餐廳為省成本，檸檬直接清零，改用沖劑！有網民在帖文中表示曾經因檸茶無檸檬而「叫住個侍應話水吧漏了檸檬比我」，然而侍應卻回應：「 完全將檸檬榨到連核都無，係原汁原味，但我一啲都唔覺囉」，更有網民向使用沖劑的茶餐廳員工求真，「佢哋啲員工話咁整法慳好多，但我覺得唔知飲緊乜」、「檸檬酸、無營養」，有傳媒向香港餐飲聯業協會會長黃家和求證，他表示「一年前已聽聞本地有餐廳改以榨取檸檬汁，作為調製檸檬茶的原料」、「有中央工場將整個檸檬榨取成汁液，用以『降低成本』」，慳家成大勢，不過網民就完全唔接受，直斥「連檸檬都慳，都冇心去做，執咗佢把喇」，到最後港式風格的篤檸檬茶，會不會被淘汰而成為香港人的集體回憶？
