何詩蓓高EQ回應「遺憾論」：佢哋對我期望唔係自己目標
對於成為香港史上獲得最多奧運獎牌的運動員，何詩蓓表示：「係一個好大嘅Honor，但我參加奧運目標唔係想成為最多獎牌嘅運動員，都係做足自己本份，盡力比賽盡力去游，可以為香港爭光係我嘅光榮。」
她對於有人認為她摘銅有「少少遺憾」的看法，何詩蓓大方回應：
「我自己好享受今屆奧運，我目標都係好好發揮自己水準，同埋我成日都話比賽過程比結果更加重要，我過去三年訓練盡咗自己努力，做到自己最好，咁就冇遺憾。」
「我明白我去奧運之前好多人對我有期望，佢哋對我期望唔係自己目標，我知道我同教練傾好咗嘅Plan同Goal係咩，我做自己想做嘅嘢就開心。每個人都有佢自己意見，我都唔係好理會其他人講法，佢哋都想講咩都冇咩所謂，我自己好少睇有關自己嘅報道，集中返喺自己想做嘅嘢就得。」
王敏超「兩戰奧運」成績公開 初賽已出局
今年72歲的中國香港游泳總會會長王敏超日前（8月1日）在港台節目《千禧年代》受訪時講到，對何詩蓓嘅成績感到開心，不過就認為佢同前兩名對手時間相差不足1秒，差點就有更好成績，因此表示感到「少少遺憾」。
根據資料顯示，游泳總會會長王敏超都有「兩戰奧運」紀錄，1968年，他首次參戰奧運會100米自由式賽事，游出58秒成績，可是在初賽已出局（當年冠軍為澳洲選手Michael Vincent Wenden，成績為52.2秒）。
1972年，他參戰第二次參加奧運，游出57.53秒，可惜同樣初賽出局。如今有「後浪」何詩蓓出現，在奧運女子自由式憑52.33獲銅牌，相比王敏超會長當年游快了5秒有多！
何詩蓓尚未考慮退役
關於未來的計劃和是否會考慮退役，何詩蓓透露：「呢樣嘢暫時未決定，我知道嚟緊有好多唔同比賽，暫時奧運之後會好好休息，之後再返嚟訓練，10月中有world cup，三站都喺亞洲，所以嚟緊都會為比賽準備。」
她也分享了為何覺得這屆奧運最開心：「因為今屆奧運氣氛好好，除咗屋企人可以去現場睇我比賽，仲有好多香港市民飛咗去巴黎睇比賽，喺場館同場外見到香港人同香港區旗，就好似一件盛事咁，大家一齊去慶祝香港運動員咁多年落嘅苦功。」她再補充：「因為我喺香港出生、香港長大、香港學游水，我覺得代表香港係理所當然。」她指出，今屆奧運心態上有所改變：「之前為比賽覺得好緊張，希望到做啲成績，今次希望好好享受成個過程，因為我唔知道仲可唔可以再去到下個奧運，所以in case呢個係最後一屆奧運，我好想embrace成個moment。」
獎金如何運用？何詩蓓有計劃
關於她所獲得的300萬港元獎金的運用，何詩蓓表示還未有最終決定，但她希望能用一部分來感謝團隊的支持。「暫時未決定，希望部分獎金可以用嚟多謝返我哋團隊嘅人，佢哋為咗我付出咗好多，過去三年甚至係我成個游泳生涯，冇佢哋努力同盡責，我都唔會有今日嘅成績，所以好想多謝返大家。」
