撰文：CY｜圖片來源：Facebook群組「自助餐/放題/飲食/酒店優惠情報分享」
中環酒店燒烤自助餐夾到生雞翼 食客怒斥六百蚊食依啲好離譜
近日有港人去中環某Staycation熱門酒店食燒烤自助餐，每位收$588及加一服務費，有感高昂價格會換來高質素服務及體驗，惟事主在進食期間發現有一隻生雞翼，令她感到相當憤怒，「以燒烤命名嘅自助餐，燒隻雞翼都燒唔熟，好離譜」。
事主隨即於Facebook群組「自助餐/放題/飲食/酒店優惠情報分享」分享經歷，再控訴該酒店燒烤自助餐沒有餐飲提供，並指「仲要係食燒烤」，似乎認為無嘢飲實在好不人道，餐廳唯一值得讚賞莫過於可以帶狗內進。
網民見狀簡直高呼出聲，表示「嘩！雞刺生（身）咁重口味⋯⋯」，狂笑「一成熟，外焦香，裡面刺身」，將食一啖落口的事主封為勇士；另外又有留言話「可能比狗食，唔係比你食」，講到燒烤自助餐一文不值。
亦有網民話自己雖然未有遇到事主相同經歷，不過就長文話該酒店自助餐「昨晚去食，真係把鬼，選擇小……三個人，仟六、七元，飲品都冇包，食埋些雞翼，燒魚餅，豬頸肉，真係伏到加零一」，獲得不少網民認同。
不過亦有不少網民反駁，話雖然燒烤自助餐無飲料提供，不過就有「水放題」，就無限提供飲用水，編輯翻查酒店資料亦發現可以額外付費選購飲料，並非事主所指「無餐飲供應」。亦有網民話，其實好多酒店自助餐都包括飲料，或需要額外收費，並非只有此酒店有此做法。
