移英港人組「義工團」為新屋裝修 網民：有錢買屋無錢執屋？
事源最近有移英港人在「移英港人義工組」中發了一則帖文，指自己代網友出Post徵求義工協助。內容指一網友在鄰近曼城（Hull）買下一間約400呎的2房平房，屋內裝修較為殘舊，希望在網上招募4-5人的研習義工隊幫忙「剷牆紙、上乳膠漆、鋪Laminate地板、組裝Ikea櫥櫃」，並表示義工組員能通過此研習班學懂如何「剷牆、批灰、油漆、鋪地板、組裝櫥櫃」。基於助人自助的精神，是次義工裝修並不涉及任何金錢利益，戶主將提供由曼城至Hull的接駁交通。
帖文一出，大批移英港人湧至「報名」，指戶主是濫用香港人善心，當人「水魚」做免費勞工，當中的回應態度更是火上加油，令網民繼續「鬧爆」。
1.有錢買樓無錢裝修，業主有經濟困難？
不少網民留言指，義工是協助有需要的人，即使是英國的非牟利組織，也只幫助經濟或生活上有困難的人士，而非「幫有錢嘅人慳錢」。網民續指「如果你提供到證明證實戶主有經濟上嘅困難，我哋一定幫，但要先解釋點解有錢買屋但無錢裝修，繼而搵港人做免費勞工仲要包埋料畀佢」。對此，帖文者指自己只是代人出Post而非當事人，並不代答任何問題，加上自己從來沒有講過「戶主無錢」，若要任何證明請自己聯絡戶主。
每當網民質疑相關戶主時，帖文者多以一句「唔做義工就行開」、「有咩你直接問戶主」、「有問題唔好問我」、「就係有人鍾意做義工幫人，唔理對方有無錢」、「做義工要咁計較就唔好做」；對於帖文者的回應，網民更不憤於其態度，指「開頭諗住情緒勒索人，到人哋問詳情就話有咩都唔好問你，又話人無心做就過主，有心都畀你搞到無心啦」、「唔好做衰香港人個名，濫用義工之名喺到搵油水」、「唔係無錢但想其他移英港人出錢出力幫佢裝修，下次不如話無錢買屋叫人籌錢？」。
2.Hull與曼城「一東一西」咁都叫鄰近？
帖文中提到戶主單位在曼城附近，會提供由曼城至Hull的接駁交通。不過網民指出此說法有極大誤導成分，指「Hull在東邊，曼城在西邊，兩地最少相距2小時或以上車程，何謂鄰近？」，又指戶主提供單程交通，回程要義工自行解決？若然Hull與曼城能稱為鄰近，「天水圍同柴灣都可以話喺隔離啦」。
3.一直不提供戶主聯絡方法
網民看到招募後希望能進一步了解詳情，但每次發出問題後均被帖文者一句：「有咩問戶主唔好問我」，惟網民問及如何聯絡戶主時，帖文者則指「PM我就得」；當網民PM帖文者時，帖文者則叫大家「唔好玩嘢」，尋找戶主成一大謎團，不少網民懷疑「根本就無所謂網民，帖文者明顯想搵著數啦」、「又叫人聯絡戶主，想要戶主聯絡方法又唔畀，淨係識鬧人玩嘢，而家邊個搞事」。
4.裝修途中出問題負責誰孰？
當網民問及這個「義工研習班」是給新手「落手做」，但新手對裝修一竅不通，萬一出意外或令單位受損，責任歸誰時，帖文者指「可以叫戶主買保險」、「建議自己問咗律師先，律師要收費，我無免費義工律師」。惟網民指「即係幫人做義工，要義工自己出錢向律師諮詢然後再免費幫忙裝修？」、「義工有咩責任或條款細節要留意，呢啲資料咩都無，到時預咗要畀人鐅一筆？」。
帖文者籲移英港人「勿做自私精」
面對云云負評，帖文者選擇一笑置之，並意指「做義工唔歡迎自私精」，他回應指「我為幫人，召集幾個義工幫手裝修一間舊屋就引致大量新香港人『媽媽聲』，我踩3小時單車去幫個三五識七嘅人剪頭髮，為乜？有人話我搭個局去呃人幫自己間屋裝修？」，他亦透露「自己一直有開班免費教泰拳，幫人剪髮，大家鍾意亦可以嚟，我唔會問你有無錢，但我最憎自私精，亦唔想解釋，合則來，不合則去，我有需要呃人去裝修咩？有一個真正幫人的Group成立，就以小人之心度人，以為我欺詐，我亦知」。其後亦有少量網民「出面做和事佬」，指自己曾翻查記錄，指帖文者可能真心出文但態度令人反感，「我一開始都以為係搵水魚著數，後來入去佢account睇詳情，發現佢之前有篇文講過人之所以會有爭執係因為以個人利益作為思考本位，覺得香港人應該互相幫助，唔好計較咁多。」；亦有網民估計帖文者或在英國曾受人幫助，現時想幫人但可能沒考慮香港人的接受程度。不過帖文者最後亦強調自己會繼續籌組義工組織，推廣到全英國，「明就明」。
移英港人義工組
「移英港人義工組」寫明群組的宗旨是「聯合流散在英國各地的港人，為將會移民或已經移民英國的香港人提供免費義工或咨詢服務。服務範圍包括：睇樓，租/買屋，買車，入學，交通運輸，揾工，搬屋，組裝傢俬，家居維修，剪髮，打泰拳等等。」群組不時有移英港人出帖互相幫忙，不過今次的引發的罵戰就較為少見。
