移民英國｜英鄰居送蘋果港女連桶拎走
日前有已移民英國的網民於Facebook群組「香港人移民英國資訊分享」發文分享一則居英趣事。她表示鄰居家中的花園有種植青蘋果樹，而每年到收成的日子時，鄰居都會放滿滿一桶蘋果在門口供她取用。但去年在鄰居用水桶裝起蘋果與她分享時，她將蘋果連桶全數帶走。而今年鄰居在分享蘋果時就在桶上貼上紙條提醒到：「Take as many as you like.But please leave the bucket.（你鐘意拎幾多就幾多，不過麻煩留返低個桶）」她笑言因為去年的事件，鄰居就變醒目了！
移民英國｜網民：有冇最基本禮貌 ?
事主原本只打算分享移英生活趣事，豈料帖文的風向卻與她想像的完全相反！不少人抨擊她十分貪心「連個桶都要貪」：「點解唔話你自己貪心呀，連桶都攞走」、「咁你都幾衰喎成桶拎，仲好意思講出嚟…唔計個桶都唔應該拎晒所有蘋果啦」、「只係奇怪樓主咁理所當然將自己做得唔啱嘅事合理化」、「有冇常識，有冇最基本禮貌 ?」
亦有人表示可以理解「連桶帶走」的做法，但強調必需要歸還：「驚散修修拎唔到，咪拎完俾返個桶人攞。唔係值幾多錢，而係人哋會有需要用。最後還咗就好，希望對方唔會唔高興。」眼見大批網民一面倒的責罵，她解釋到事後有將水桶歸還給鄰居，但網民依然不接受她的解釋，繼續指責她：「要見到人哋張字條先識還個桶都有啲遲」、「少少蘋果就試到鄰居真面目」、「就算過後真係有還返個桶俾人，但首先連桶都攞走呢個行為同心態就不能接受」。
移民英國｜事主還原事件真相
面對網民大批網民的聲討，事主只好在留言區解釋：「物主同我做咗十幾年鄰居，成桶蘋果放係我花園門口，唔知係咪比我呢？我呢區無乜外來人，每一家都有前後花園，鄰居就喺每人門前放一桶，淨係我哋嗰區十幾家人先至有咋！個桶只不過係小事，如果佢介意嘅，今年就唔送啦！」
看到事主還原事件真相，不少之前誤會了她的網民都紛紛向她道歉：「誤會咗你不好意思」、「咁你早講嘛，攪到大家好人當賊扮」。亦有網民為事主解釋：「人哋鄰居仲會咁寫得都知係因為上年佢拎咗個桶，再還返比佢， 今年再寫記得留返個桶畀我呀， 呢啲擺明就係講笑啦！」、「樓主主動好心咁分享吓同英國鄰居友好關係，鄰居成桶蘋果都放得俾樓主，當然就預咗成桶攞哂啦，可能大家好friend成日你請我我請你你哋唔知之嘛，唔需要批鬥人，又話人貪心，又影衰香港人咁嚴重呀？」
第二日事主再次發文回應網民的質疑，她的帖文的原意是想介紹一下英國人的幽默感「攞蘋果好啦，唔好攞我個桶呀」沒想到引來大量正義魔人指責她貪心。而她也藉此說明一些當地文化，她表示英國人借用物品並不流行拍門詢問，較多的是借用物品時放一張紙條告知，大家都心有靈犀地了解有人借用了物品。她表示：「有時候前花園要剪草，但係想剪嘅時候，發現自己前花園已經畀人剪好咗。原來係隔離鄰居剪開草嘅時候順便同我剪埋，佢又唔會專登走過來同我講『我幫你剪咗草啦』」，過於太客氣反而對方會覺得虛偽。
