世界最高水準！Netflix鬆弛熊定格動畫製作大公開

【Netflix 鬆弛熊】日本人氣卡通人物角色鬆弛熊，4月份於Netflix上架咗一共13集定格動畫，鬆弛熊一貫悠閒懶散嘅性格及行動依然非常討喜、治癒。喺睇動畫嘅時候，你又有冇諗過其實係點樣製作嘅呢？原來呢部定格動畫《輕鬆小熊與小薰》，係出自世界知名定格動畫公司，耗時2年完成嘅精心製作！

撰文：C｜圖片及資料來源：「リラックマとカオルさん」メイキング映像

Netflix 鬆弛熊定格動畫劇集

故事內容講述一名普通OL上班族小薰（多部未華子聲演），意外地迎來2位新同居好友：鬆弛熊及白色小熊，每日都懶洋洋、輕輕鬆鬆的。但就因為咁嘅性格，同埋可愛模樣而甚得女主角歡心。故事圍繞小薰、寵物黃色小雞及2隻小熊溫馨平淡嘅日常生活。

劇情情節非常簡單，例如有一行人閒逛河邊、小薰上班時遇到不順心等情節，簡單瑣碎得嚟，濃厚生活感容易令人有代入感，係一部治癒型動畫劇集。適合一眾希望忙裡偷閒嘅打工仔。

於Netflix上架嘅《輕鬆小熊與小薰》，由世界最高水準嘅定格動畫公司Dwarf製作。

導演小林雅仁稱，一共13集嘅定格動畫劇集，製作時間約2年，只係拍攝都已經需時約7個月時間！

劇集一共拍咗22萬格影像鏡頭，而每一位動畫師，一日最多拍攝到約10秒鏡頭。製作認真之餘，所有細節都處理得非常精細！

編劇荻上直子發揮出更強創作力，利用定格動畫嘅無限空間，實現飛上太空、與雪人共舞等天馬行空嘅畫面。描繪得細緻清晰的storyboard亦令導演更能掌握到節奏及劇情。

劇集裡每一個環境細節都處理得甚是精細，濃厚嘅生活感，甚至能令人產生「係咪真係有人喺呢個世界生活」嘅真實感。

小道具之外，光線嘅角度同飽和度亦係劇組特別注意嘅細節，例如咩時分嘅陽光應該由咩角度照入、光度應該幾多先適合。

女主角小薰係一個普通OL上班族，生活中所遇見嘅事情，同大部分觀眾都相同。編劇希望帶出嘅係，日常生活令你忙得焦頭爛額時，會唔會亦令你忘卻咗生活裡一些小小嘅開心事呢？希望鬆弛熊能讓觀眾從日常嘅緊張感中放鬆下來，舒一口氣。