Fresh Grad港男呻母親要求1萬元家用 打亂人生計劃無路訴
「畀家用」在華人社會中，屬一種回饋父母多年供書教學的「孝心」，不過在「人工趕不上通脹」的環境下，家用的多與少都注定你的生活如何。最近有Fresh Grad打工仔在討論區問及大家「家用應該畀幾多」，表示對此非常煩惱。事源家庭背景可算是中產級別的樓主，家中有父母及一個就讀中二的妹妹，本來畢業後便找到一份月入$19,500的工作相當不錯，卻因「啊媽獅子開大口」而感到非常大壓力。
索1萬家用為幫舅父買樓：「我就慳到盡，佢就使到盡」
由於家人擁有700呎私樓，父親收入穩定，計劃5年後退休，一切都「唔算豐衣，但算足食」，因而從來都未有幻想過父母會要求給予高額家用。但往往事與願違，樓主指「一直都諗住畀$4,000，但啊媽就要求的每個月都畀一萬蚊家用」，問題是一萬蚊家用竟不是用於日常生活的開支上，「佢話係用嚟借錢畀舅父買樓同代我儲錢買居屋」。
港媽大方借20萬給親戚「一去無回頭」 樓主：佢之前仲誤信傳銷蝕咗十幾萬
最離譜的是原來5年前母親誤信傳銷而蝕了十幾萬，加上借錢給親戚「20萬一去無回頭」，加上兩兄妹每年4萬元保費，負擔確實不少。雖然母親曾一度重返職場，但最終以「唔開心」而辭職，現時則以專心照顧妹妹為由「日日留喺屋企煲劇」。樓主再指，自己由細到大都沒過物質生活，「買過嘅玩具十隻手指數得晒，到而家都係用緊舊款手機；但啊媽就買3部吸塵機、iPhone同網購，成日打麻雀唔返工，十足十蛀米大蟲」。
母親另類投資大計到摻一腳 樓主：我自己嘅計劃就打亂晒
除了「有苦無人知」外，樓主指自己本身的人生計劃都被破壞，「本身諗住一個月衣食行用$4,000，剩低$1,000-$2,000做娛樂費用，扣除家用$4,000都有近一萬儲低，之後就可以讀master或者去旅行，而家就一嘢少咗一半預計儲蓄，返工都無動力。」但事情還未完，母親還有其他投資計劃，指「佢想阿爸60歲嗰陣喺私樓除名，然後去抽居屋，我同阿爸夾份供再租畀人」，又言「佢話幫手畀首期，但見居屋二百萬都有，首期都只係二十萬，自己努力儲兩三年都有，最慘又唔知抽唔抽到，租屋又好似掟錢落海咁。」
網民：出嚟做嘢千祈唔好自爆人工
有網民看到樓主分享後指故事教訓世人：「唔好自爆人工」，表示「我由第一份工開始，長達10年時間俾一半人工做家用，從來都係唔夠洗㗎，不過後尾搵到兩份part-time，之後創業，終於生活好過」、「香港太多父母養兒為防老了，但她們忘了仔囡將來都會有頭家要養」、「我第一份工啊媽要我俾一半家用，收第一個月人工時，佢話幫我儲住佢，而家等我嫁人，一元都無，仲要我自己畀嫁妝」。
不過亦有網民指一萬元家用其實正常不過，表示「其實父母養到你咁大，供你讀咁多書，咁你出嚟做嘢，畀返家用都應該嘅！ 而且唔好話幫補家計吖！畀返自己嗰份都要啦」、「我都係俾一萬蚊家用，屋企食住，出外租屋邊有咁舒適，父母供書教學唔容易，我覺得一啲都唔過分」、「成人投身工作，根本就應該將大部分收入交出畀父母。當家用或當感養育之恩都好。唔關你阿媽是否躺平。在下當年畢業工作，邊度需要父母開聲，自動自覺就將七成收入交出」。
