撰文：《經一》編輯部｜圖片來源：連登討論區、unsplash、政府新聞網｜原文刊於《經濟一週》
樓主：61萬公屋買唔買得過？
日前，有網民於連登討論區以「61萬公屋買唔買得過？」為題發文，指自己與嫲嫲及父親三人同住在黃大仙一個300呎、有兩房一廳的公屋單位。樓主指，雖然家人並無意將單位買下，但覺得自己快將畢業且有意繼續住下去及有少少cash，因此想盡早「搵到地方落腳」，亦可當作買給父親居住。
轉手賣出必賺？網民：政府送錢畀你仲要諗
帖文一出，網民幾乎一面倒建議樓主理應買下單位，直言以61萬元買入市區單位，再轉手賣出定必穩賺。
- 「梗係買，呢啲問題都要問！買咗， 轉手即賣都賺兩球。十幾廿年前開始出售先廿幾萬， 當時冇買已經做錯咗。」
- 「61萬根本唔使諗即買，人哋61萬半份首期都唔夠。」
- 「政府送錢畀你仲要諗？」
- 「唔使諗一定買。早三年前都係買咗南昌附近租置公屋，680K。過咗頭三年定五年之後可以賣番出去補地價，有本事自己儲到錢之後轉過手賣番出去再換屋，冇本事咪住自己間公屋。」
- 「一球都唔使嘅市區樓，冇理由唔買啦！」
- 「61萬，買個同區車位都唔得⋯⋯我就會買喇！」
- 「必買唔使諗。你睇下租置邨二手賣番出嚟嘅新聞，新界區細單位起碼百幾2百萬，樓主仲要市區單位！」
「買咗就係資產，仲要值過百萬，只係比而家畀多幾千蚊月供，係財富增值，唔係負擔。如果遲啲，你阿爸都百年歸老，你自己組織家庭就可以變賣，多一筆財富⋯⋯如果諗間屋係可以變綠置居或者第二市場居屋，就唔好諗呢啲冇把握嘅嘢，抽中市區綠置居機會低，居屋貴，點解唔買咗佢，之後賣，變相啲錢靈活變首期或者變其他資產。」
月供幾千蚊當交租？
又有人坦言，以61萬元購入單位後，無論是做10成按揭或是8成按揭，月供僅數千元，長遠而言，比租樓還更划算。
- 「呢單嘢邊有討論空間，好處就唔講太多，61萬一個月先供幾千元，剩係冇兄弟姊妹同你爭，已經完全冇唔買嘅理由。」
- 「買，8成按揭，分25年還。月供2,100元，當交租，點解唔買？業主寫你名，之後阿嫲老竇再申請公屋攞多間！」
- 「梗係買啦，61萬蝕住來做，你租多幾年劏房已經喺度了！」
- 「10成按揭供15年都只係月供4,000元有找。4,000元喺市區連個有蓋車位都未必租到！」
買咗保證自己有地方住
有網民則認為，如果樓主現在將單位買下，就算有朝一日她的父親離世，亦保證有地方居住；相反，如果沒有將單位買下，樓主未來的入息超標，父親離世後，亦無法繼承現在所居住的單位。
- 「買！Touch wood你老竇有咩事過咗身，你入息一定超標冇得繼承間屋，到時你出去要租番一樣尺寸單位啲錢，租幾年都等於呢個數。」
- 「買。如果爸爸他日仙遊，自己一定有地方住。」
除了能為未來作出保障，有網民指將單位買下後，無論是自己成為業主，或是父親，對樓主長遠而言亦有好處，因此「搵唔到唔買嘅理由」。
「第一，樓主買咗可以用自己名做業主（當然現在要有名於戶籍先得），然後老竇阿嫲再排老人特快公屋，幾年後就已經一變二，隨時派到租置嘅再買，派唔到嘅就綠表買居屋，再放黃大仙現有公屋，就有嚿錢做首期。
「第二，買完照用老竇名，樓主留番個首置名額，將來可能買私樓或已補居屋。所以我覺得，冇理由唔買！」
網民：除非有黐線佬鄰居、想移民
有網民坦言，除非鄰居有問題，或者有移民打算，否則建議樓主應將單位買下。
- 「60萬all in都抵！樓主，除非你左右隔籬係黐線。」
- 「梗係買啦，61萬租樓住幾年都喺番度。Btw，隔籬左右係咪正常人？佢哋住咗幾耐？」
- 「買啦，除非你諗住過幾年移民。」
- 「其實買得過⋯⋯除非有黐線佬鄰居先唔會買。」
單位樓齡高 或須承擔高昂裝修費？
雖然大部分網民一面倒，認為樓主應買下單位，但有人卻認為單位樓齡高，購入單位後，未來需要承擔大廈的裝修費，建議樓主應該三思。
「三十幾四十年樓，大把維修要做，你買咗就全部要自己畀！綠表買居屋好過。」
「唔係一般嘅煩。好似東頭邨，早兩年房署先發現原來冇預到冷氣機出水喉位，被迫全部要畀錢裝。然後貴東樓因為新冠肺炎又搞到要驗污水渠，又話要裝嘢又要畀錢，仲有，佢過幾年又要換𨋢又要夾！」
經租者置其屋計劃 以低於市價購入單位
事實上，政府早於1998年初推出租者置其屋計劃（租置計劃），容許居住在租置計劃屋邨的住戶，以低於市價購買所住的單位。不過，政府於2002年重新修訂房屋政策，房委會於2005至2006年推出第六期乙租置計劃，已將計劃暫停。現在，居住於租置屋邨的住戶仍可購買所居的單位。
租置屋邨名單，可參考房委會網頁。
