最近睇咗一套電影，叫《波希米亞狂想曲》，講述一隊叫Queen嘅樂隊，同埋主唱嘅人生經歷。睇完套戲之後，我返到屋企就搵番好多Queen嘅歌嚟聽，仲開始有少少上癮。
重溫8、90年代經典音樂 發現……
相信大家都知道，YouTube有個功能就係當你睇得多某一類影片，首頁就自然會出現相關嘅其他影片吸引你觀看。
於是，我每日喺屋企就不停聽啲８、９０年代嘅外國樂隊同歌手，對於從未接觸過呢類型音樂嘅我，就好似開闢咗一個全新嘅宇宙一樣。
即使相隔廿年以上嘅今日，音樂嘅旋律、歌詞完全唔覺得老土。
除咗音樂，我亦開始搵啲舊嘅電影去睇，當我發現喜歡聽嘅歌或電影，就會上網搜尋樂隊或影星嘅資料。
我好好奇呢班勁人今時今日做緊乜呢？原來……好多樂隊已經解散咗或退出樂壇，好似My Chemical Romance咁各自發展，亦有啲好似Oasis咁兩兄弟鬧不和，有啲好似Queen主音Freddie Mercury、Nirvana主音Kurt Cobain、Michael Jackson咁已經喺天堂……
重溫當年香港電影 覺得自己錯過了很多事
至於電影，不得不提嘅，就係香港舊時嘅電影真係好好睇。劇情雖然比較簡單，但每一套都有一個獨立嘅「主題」，唔會單單玩新「題材」就算數……所以就連韓國、日本，甚至外國都非常鍾意當年嘅香港電影。
我每次見到咁都會覺得好可惜，總係覺得人生錯失咗好多嘢！如果我有機會睇佢哋嘅演唱會，買到佢哋期待已久最新推出嘅唱碟，感覺會係點呢？
我聽阿爸講，當年佢好鍾意張國榮，每次張國榮出新卡式帶，就會同幾兄弟夾錢買返屋企日聽夜聽，仲會約埋成班朋友一齊聽，聽到磁帶都壞埋。
依家只要上網，打個歌名就已經隨時聽到新歌，就算有鍾意嘅歌手樂隊出新歌，相信都唔會有以前嗰種感覺。就好似即使你長大之後，有錢買番晒細個好鍾意嘅玩具，嗰種感覺已經唔同晒……
唔知再過多廿年，再回顧番今時今日，會唔會又係同一種感覺呢？
