【陶瓷器 修補】大家有冇識啲朋友係「自帶鈎」嘅呢？即係行到邊，就打爛嘢打爛到邊！如果唔覺意一個轉身，打爛咗去旅行買返嚟嘅陶製品、自製嘅陶器紀念品，都真係會心痛到欲哭無淚⋯⋯唔使心碎住！只需用牛奶，就可以令陶器「無縫接駁」，回復本來嘅面貌！
撰文：卡｜圖片：Twitter
陶瓷器修補大法 用牛奶就得！
呢個方法喺唔少DIY情報網站上瘋傳，例如外國網站「Apartment Therapy」，於2011年便將呢個方法列為「有裂痕陶瓷器的修補方法」之一，並作介紹。
第一步：將有裂痕的陶瓷器放入煲/鑊等煮食器具中，倒入適量牛奶（能蓋住裂痕部分的分量）（或將碎片用夾固定，再放入煲）。
第二步：用慢火加熱1小時。
第三步：待牛奶冷卻後，才將陶瓷器取出。
牛奶修補法原理
據製造膠水嘅相關工廠業者解釋，牛奶含有稱為「酪蛋白」嘅成分，係一種可被用作「天然膠水」嘅蛋白質。不過「天然膠水」喺耐水性方面比合成膠水弱，如果使用「酪蛋白」嚟黏合，有機會遇水就會分解。
如果係裝飾用嘅話，基本上冇問題！亦有網友半年前用呢個方法修補陶瓷碟，最近用嚟裝熱水都冇事，但啱啱補好嘅就比較脆弱，建議唔好咁快掂水住喇！
