撰文：《經一》編輯部｜圖片來源：unsplash、中新社｜原文刊於《經濟一週》
樓主：失業3個月有offer 人工14K、返工來回3個鐘
日前，有位網民於連登討論區以「有offer 但返工地方好遠」為題發文，表示自己為2020年的畢業生，失業3個月左右。他表示自己居於大西北，早前收到offer，但卻因為返工地點太遠，車程耗時個半鐘，不知道應否接受。
「2020 FG（Fresh Graduate）失業咗3個月左右。前幾日interview，今日收到offer，但坐車去嗰度要個半鐘，中途要轉車，人工14K。應該要接受？」
網民點解話「不了」？
樓主的帖文一出，引起網民踴躍回應。有人認為返工地點太遠，加上人工不算高，不應接受該offer；亦有網民勸樓主「諗下交通時間佔咗你人生幾多個鐘」，又有直言返工個半鐘，來回三個鐘足以從香港出發到台灣。
- 「不了，個半鐘+個半鐘。」
- 「半個鐘？5分鐘內返唔到公司嘅工都唔使諗啦！」
- 「咁低，仲要個半鐘，不了。」
- 「諗下交通時間佔咗你人生幾多個鐘。」
- 「垃圾工！3個鐘可以去到台灣來回。」
- 「車程個半鐘，來回冇咗三個鐘，每日車錢最少都30蚊-40蚊。得14K，唔好玩啦！」
- 「人工已經低，如果連返工距離唯一優點都冇，好難說服自己捱一年先。」
網民：返到屋企已經「攰到唔想做其他嘢」
又有網民分享自己的經驗，指車程太長，放工後已經「攰到唔想做其他嘢」。
「之前都試過有個offer係咁，後尾諗諗下都reject咗。用嗰3個鐘可以做到好多嘢，同埋搭咁耐車返到屋企都會攰到唔想做其他嘢。」
- 「如果唔係好等錢使，就唔好返喇！因為真係冇晒私人時間。除非公司大，寫落CV好睇，都可以捱一年。如果等錢使就做住先，再積極搵其他工。」
- 「慘過去機場，機場起碼真係遠，但係好pay啲。」
- 「太遠真係唔掂，返到個人冇晒精神同時間。」
- 「我自己通常見到東九龍都唔會報，諗到日日要塞完龍翔道塞屯公都覺得辛苦，仲要九龍灣未必有位坐。」
人工13K、車程2個鐘 比14K嘅offer好？
有網民則比較14K、返工來回3小時的車費，以及13K、每日返工2個鐘車程，並勸樓主作出決定前，應想清楚。
14K 每日3個鐘車程、40元車錢 vs 13K 每日2個鐘車程、20元車錢
返20日，time cost 差20個鐘，以時薪85元換算 即1,700元，車錢差400元。即係返14K遠工同13K近工成本相差2,100元，未計早咗起身、遲返到屋企呢啲隱藏嘅心理時間成本，自己諗。
返工來回3個鐘 好過再失業多3個月？
雖然有不少網民認為返工車程太長足以令人卻步，但有人卻認為樓主是畢業生且失業一段時間，可以考慮「做住先」，之後再搵其他更好的工作。
- 「你有屋企人要照顧？一定要早啲返到屋企？又冇負擔嘅時候又冇個好啲嘅offer，又冇工作經驗，點解仲要諗？利申：新界區返中環 來回兩個半鐘車程。」
- 「騎牛搵馬咁，一路做一路搵工。你要記住你已經失業咗3個月，來回3個鐘好過你再失業多3個月。」
- 「返兩日先，頂唔順就即辭，唔使同佢客氣。」
- 「冇其他offer你揀？失業咗3個月，車程3個鐘都去試下先啦，又未有其他更好嘅offer，呢個時勢有工返算係咁。」
「我都覺得可以返咗先，一路做一路再搵工，就算扣晒車錢，你都仲有至少10K落袋呀！仲有工作經驗呢啲可以幫到你搵下份工。不過要預咗每日返到去會攰囉！但其實返返下會慣（會覺得攰但真係會習慣個車程）。」
網民：公司規模、福利都好重要
亦有網民建議樓主在決定是否接受offer前，可考慮該公司的規模以及對未來職業規劃的幫助。
- 「份工係普通工定對CV/你career path有幫助先？求其一份就嘥氣啦！自己鍾意嘅想做嘅咪返住先！」
- 「睇埋公司文化。要人好準時返工、要打卡嘅話就唔好做。最好有flexible working hour可以揀幾點返工。」
「老實講，2020 FG、14K非專科真係算係咁。上面話九龍東不了，但香港有一半工都喺嗰一帶，係你自己住大西北遠，不過放工時間係地獄。另外，我覺得仲要睇下份工嘅前途、福利、公司規模。」
樓主居於大西北 網民：遠嘅係你，唔係工作地點
不過有網民卻認為，樓主居於大西北，本身「返邊都遠」，更有人直言：「遠嘅係你，唔係工作地點。」
- 「你住大西北就唔好介意份工遠，因為遠嘅係你，唔係工作地點。」
- 「住粉嶺上水大西北就冇計啦，返邊都遠。」
- 「咁唔係人哋遠，係你屋企遠，大西北去邊都成粒鐘㗎啦！」
- 「有同事日日天水圍返柴灣都係咁返啦！」
