餐廳侍應「睇唔過眼」食客5大怪要求
坊間有傳香港人出名要求高，但同時「西客」出現的次數亦出名多，何解？最近有從事餐飲業的網民以「香港人做食客可唔可以畀啲同理心」為題，力數5大極不合理情況。
1.專問餐牌上無的餐
事主指，餐牌已寫上餐廳能提供的食物選擇，但客人經常問他們餐牌上沒有的菜式，令前線職員經常「一肚氣」，如「去西餐問有無雲吞麵」、「去中餐問有無卡邦尼意粉」、「點解呢間餐廳無我想食嘅嘢」。事主指，基於禮貌而不能反怪客人，但心中亦忍不住一句：「想食咪翻屋企自己煮囉」。亦有網民指很多客人問「檬粉即係咩麵？同米粉有咩分別？」、「幼麵有幾幼？同粗麵爭幾遠？呢度無寫有檬粉，我可唔可以轉檬？」。
不過有網民對此表示極不同意，反叫餐廳職員「唔好咩都話人西客，你有人工收你有責任㗎」，並指很多餐廳都有Secret Menu，特別菜式不會寫在餐牌上，「有時問一問先知原來有」，亦有人試過「茶餐廳餐牌無菜遠牛肉飯覺得奇怪，我先問職員，職員同我講有，咁唔問點知啊」、「餐牌寫漏又唔見你say sorry道歉」。
2.下單要求古靈精怪：熱檸水走水
茶餐廳叫嘢飲最常見的都是「全走」、「少冰少甜」、「走甜」，事主指現時越來越多人下單時有古靈精怪的要求，「嗌杯嘢飲要叫少少甜或者微甜，咩叫少少同微甜？飲手搖飲品飲到傻咗？台式就話有分甜度咁細，茶記唔會知你點先算微甜啊」。對於此點，不少網民表示認同，指「有客咁講我只會回佢一句『要甜定唔甜？唔好講咁多，水吧無咁多嘢分」。不過最奇怪的要求是「飲熱檸水要我走水，咁仲叫唔叫檸水？」、「我試過凍檸茶走檸檬」、「寫到明辣麵，都要問有冇得走辣」，網民更指「呢啲客真係極品，仲要講得出先奇」。
有網民就反擊，指平時叫少甜都依然甜到不能喝，「走甜又落甜，你哋D糖免費㗎？落得咁順手？」、「熱檸水走水係因為外賣先會，拎到返去飲都浸到酸晒點飲啊？益咗你哋啦做少樣嘢」、「我試過餐廳主動問我使唔使走水啦，即係你哋內行做法係咁但你唔知，唔好又話人西客啦。」
3.四寶飯當「車仔飯」 常被要求「轉餸」
事主指四寶飯一早已標明「四寶」在餐牌上，但永遠都有客人要求用A轉B，而B是餐牌上沒有列明的，當職員拒絕則會被怪責，指「其實你咁想揀咪去食車仔麵囉，寫好又要問有無得轉，識唔識睇餐牌？」
食客此時再大反擊，指餐廳有時售罄部分食材時也會要求食客更改，餐牌上也沒有標明，那是否代表餐廳「西」？網民分享指，「試過佢話牛河賣哂，走埋嚟問我轉個常餐畀你，減你錢加免收凍飲，你轉唔轉？照你咁講以後都唔應該接受呢個offer啦」、「落完單走埋嚟話叉燒四寶飯賣哂，轉油雞四寶比我得唔得，想唔食但又話唔可以退錢，食又唔係四寶飯，你轉就得，客轉就唔得？」
4.侍應：「有QR code又唔用，係都要人手落單」
事主指現時很多餐廳為了節省人手成本而設立「QR code落單」方法，但客人永遠選擇不使用QR code，「人手減少咗，樓面原本已經多嘢做，仲要招呼你一個專登幫你落單？自己跟唔上時代步伐，返去屋企樓下打冷啦！」其後有網民指，「啲客講極都唔聽，咪由得佢等下，又唔係我要食」、「擺到出嚟都當睇唔到，點會唔識用」。
食客則反指「人手落單幫你保住份工咋」、「明明QR CODE落單仲都可以拎嘢食都嚟錯枱，你哋連睇單都唔識睇」、「用QR code 落單無問題，但唔好再收我加一」、「QR code落單有時好慢或者收唔到，網上落單果個網無用」。
5. 臨Last Order先落單
事主指更離譜的是，店舖本應8:30關門，8點為Last Order的時間，總有客人7:59進店點餐，到了關門時間也不離座。他更指，若是外賣也沒有那麼激心，在香港從事服務業早已沒法與其他國家比較，香港餐飲業一直也只能「低聲下氣」遷就一班「西客」，更因一句「今時今日咁嘅服務態度唔夠㗎」搞到人人自以為高高在上。隨後有網民對此表示非常同意，指「試過有客坐到10點都唔走，直接熄燈先肯行」、「唔知佢哋點解賴死喺到，食完嘢又唔走係都要霸住張枱」、「佢哋真係唔逼唔走，香港人西客無得救」。
不過對於Last Order的問題卻引來很大爭議，食客紛紛指「你規矩係8點前落好Order，人哋確實係8點前嗌到嘢食有咩問題？」、「你唔想做嘅就同你老闆講唔好畀人有Last Order嘅時間線」、「人哋無超時做壞規矩就係無錯，一係你講明唔可以」、「你接得單就代表肯做，關面唔面皮厚咩事？不如話你趕收工唔想做，咁你就話你老闆有問題啦」。
