網紅越嚟越多，要得到關注絕對要花啲心思。內地一個網紅日前就PO左兩張清潔公園嘅相，呼籲網民一齊保護環境，以提高個人知名度同粉絲量。點知事隔無耐就被人踢爆一切都係造假嘅，佢嘅行為唔單止無保護環境，仲嚴重破壞環境，增加左清潔人員嘅工作量！事件揭發後，當事人即時回應，指自己其實另有苦心，之後就急急刪除左個人嘅微博帳戶喇！
撰文：Bianca.L |圖片：微博（原文刊於《新假期》）
網紅為呃Like甘做垃圾蟲
網紅呢個新興嘅行業，短短幾年間已經迅速泛濫，要脫穎而出都真係要費盡心思，另闢新徑。內地一個網絡主播鄭家宜日前就上載咗兩幅喺公園清理垃圾嘅圖片，以「和家宜醬一起保護環境，6月5日世界環境日走起 」為題發文，指當日係世界環境日，鼓勵網民一齊保護環境。
其中一張相入面，滿地都係膠樽、紙箱等垃圾，而一名身著白色衫嘅女仔就拎住掃把等等嘅工具，望落似準備進行清理。至於另一張相入面，滿地垃圾已被清理，並裝好入編織袋。網民見到圖文並茂，都紛紛表示稱讚同支持。
點知相片得到大量轉發，最後引嚟公園管理處人員留言：
「我們是公園管理處的，昨天中午拍的吧，你這兩張照片怎麼拍出來的你自己不知道嗎？」
鄭家宜就回應：
「是呀，公益嘛，就是不說只做！加油喔！」
原來，管理處嘅回應另有乾坤。管理處後來公開閉路電視畫面，鄭家宜清理垃圾當日，係率先影左張地上一片乾淨嘅相，當係「清理後」，再將同朋友帶黎嘅4大袋垃圾入公園內亂倒亂撒，聲稱係「清理前」。前、後圖影完，幾位就遺留左嗰4袋垃圾喺公園，拂袖而去。
真相廣傳後，網民即時倒戈斥責。鄭家宜就回應指：
「如果我們這種反向表達方式觸犯了法律，只要能讓更多人認識到環保的重要性。被罵被處理，我們也心甘情願。」
鄭家宜以感謝同誠懇嘅態度回應網民，隨後刪除左個人嘅微博帳戶。
