婆媳糾紛就聽得多，其實男方同女方父母傾禮金，都係一場關係戰爭嘅開始。
講錢傷感情，女家堅持收十八萬禮金
最近朋友打算同拍拖好多年嘅女友結婚，死慳死抵，終於畀到首期買人生第一棟樓，擺酒搞到差不多人格分裂，喺親戚面前做完馬騮戲，以為終於可以修成正果，點知喺傾禮金呢個環節上「卡關」。
女方父母一定好錫個女，一開始已經獅子開大口，話擺酒收到嘅人情歸佢，呢度已經冇咗幾十萬。但諗住算數啦，個女從此冇得一齊住，當哄老人家開心。
諗住禮金方面可以慳番少少，點知女家一開口就十八萬八千！
講錢銀就傷感情，但我朋友真係畀唔起呢個價錢，又唔想當面拒絕，惟有叫未來老婆同父母傾。
結果都係冇價講，仲喺一家人食飯時當面串佢：「係男人就做足準備先結婚啦！唔係買玩具玩泥沙啊！」
你的禮金如何，你個女的生活也必如何
呢一刻，朋友終於忍唔住要爆了。
佢話：「伯母，而家咩年代？我為咗買層樓同你個女結婚，已經儲得好辛苦，擺酒啲人情你又已經攞晒，我邊有錢畀十幾萬禮金？」
「我唔係貪錢啊！以後我個女成世就跟你，禮金係證明你有能力照顧佢。」伯母。
「你有冇諗過，你的禮金如何，你個女的生活也必如何？我同佢每日捱麵包，就係因為你呢十幾萬！」
呢場戰爭點樣收科？當然係女家父母用前輩身分壓落嚟，一句：「你咩態度啊？咁樣同我講嘢？」令到朋友冇聲出啦！
最後，禮金由十幾萬變成六萬八，朋友都一樣要周圍問人借錢……但朋友同女方父母嘅關係，就畀幾多錢都修補唔番。
笑大陸土豪、俗氣，其實香港都……
成日喺網上睇到啲大陸土豪，結婚時啲金飾戴到好似Iron Man咁，又用銀紙當地氈。我哋睇嗰時會覺得佢哋好俗氣、土豪、冇文化。
但其實，香港就算結婚係「中西文化」融合，每個環節都係同錢銀有關，想慳少少……就代表你唔夠氣派、小家、窮！
呢種心態同大陸土豪又有乜分別呢？尤其香港生活艱難，買層樓都已經花光一世運氣，老一輩仲係唔識退一步，結果只會係自己子女受苦。
