所以有時上對方屋企都要偷偷摸摸，等冇晒人先可以上去坐一陣……
初初同女朋友拍咗幾個月拖，或者時間太短未穩定，大家都仲未去到見家長地步～
所以有時上對方屋企都要偷偷摸摸，等冇晒人先可以上去坐一陣……
冇錯，係一陣……
當女朋友屋企人就嚟返，我就要好似逃兵咁準備走佬。
「仲有200米咋！」
「Roger！Roger！全軍即刻撤退！」
其實，得我一個人～
由於每一次都只有好短時間，而且仲要輕輕的來，輕輕的走，
就連一套電影都可能睇唔晒，所以我決定向法官大人上訴～
「聽日可唔可以上你屋企呀？」
「唔得呀……阿爸阿媽喺屋企……」
「吓……上次見得一陣……不如搵晚上你屋企瞓啦……」
「但係佢哋未必會畀……」
其實我有時都唔明……
我個樣都唔係咁差啫…… 又唔使咁怕我嘅……
不過，我都明白當感情未咁深厚，都唔想咁快驚動伯母嘅，
唔係到時真係hi auntie～！
「呃……你咪話聽日佢哋兩個都返早嘅～咁不如我朝早上嚟吖～」
我帶住一把「很想要」嘅語氣，希望法官大人可以批准。
「都可以嘅……你六點鐘上嚟啦……」
其實要無啦啦朝早六點起身……再行一輪上對方屋企再瞓，
成件事真係又攰又怪！
但好彩，嗰晚有波睇，時間就完全掂晒～
「好呀～」
到咗第朝六點，我已經準時到咗女朋友樓下。
因為自己都係第一次同女朋友瞓覺，真係好興奮(我哋未有機會去旅行)！
「喂～我到樓下喇！」
「你等陣上嚟唔好咁大聲……」
「發生咩事呀？」
「佢哋依家仲喺房呀……應該冇咁快出門口！」
糟糕了！
唔通要我喺樓下癡癡的等？
「咁……我係咪照上嚟呀？」
「係呀～記得唔好出聲！」
作為一個軍人！潛行空間絕對係基本嘢！
「放心，我一定會無聲無息潛入敵陣！」
話咁快，我已經到咗門口，仲見佢大門打開。
「喂(勁細聲)~~」
「入嚟先～」
如是者我放輕腳步，驚死踩中地雷一樣。
「我對鞋……應該點呀？」
「你攞埋入房，費事被佢哋睇到～」
呃，個衰妹又會咁醒目嘅！果然做戲做全套！
「收到法官大人～」
「法你個頭！」
有驚無險，任務完成！
我同女朋友瞓喺床度，雖然兩個人係就係迫咗啲，但終於可以攬住對方瞓覺！
而重點係，唔使再有限時，真係可以放心去瞓，感謝主～
或者伯母仲喺隔籬房，我哋講嘢都唔敢咁大聲，
講多兩講，女朋友仲瞓著埋添！
(可能我都好攰，轉頭都瞓埋……)
中午十二點，陽光透過窗邊滲入屋內，
畫面就好似人哋拍情侶劇一樣，成件事好唯美。
我一開眼就望到女朋友熟睡嘅側面，發覺佢真係好得意，
仲忍唔住錫咗佢一下面仔。
呢種感覺，真係sweet爆～:)
PS： 其實攬住係瞓唔著～最後一定會解體haha。
利申： 純粹瞓覺。