平民去澳牛拍片被狂X兼趕出門口　知名KOL就任拍唔嬲？

人總係犯賤嘅！無論澳洲牛奶公司(「澳牛」) 夥記嘅態度幾惡劣都好，門口條人龍依然係咁長！香港人未排隊已經諗定叫咩餐，外國遊客就練定幾句點餐限定廣東話，個個都驚死被人鬧！YouTuber香港人夫Benjamin同日本人妻Momoko偏偏唔怕死，勇闖澳牛拍片，結果……

撰文：wfc｜圖片：YouTube Benja & Momo Channel | 編輯：MaggieMalau @Central ( 原文刊於《東方新地》 )

其實係人都知，只有大肚婆喺澳牛有「VIP待遇」，可以慢慢食、慢慢行，但YouTuber Benjamin同日本人妻Momoko就話你知，原來唔止大肚婆有特別優待㗎！究竟佢哋口中嘅「一些YouTubers」係邊個呢？而Benjamin佢哋又拍出幾「真實」嘅一面呢？

未排隊先緊張

好啦！Benjamin同Momoko呢日去到「澳牛」，未排隊已經先緊張！真係好緊張！究竟佢哋所指，拍到「最真實一面」係點呢？大家慢慢欣賞！！

好啦！終於到Benjamin同Momoko入去喇！不過行得慢少少已經被人「問候」，侍應哥哥呼喝道：「快啲！」

大家都知道「澳牛」出晒名光速上菜，Benjamin完全拍唔到上菜嘅一刻！

好啦！上文提到Benjamin話今次可以畀大家見到「澳牛」最真實一面，但同時「一些YouTubers」喺「澳牛」受到特別厚待，原來係講緊俄仔Ansheles同鄭金鈴(Ling Cheng)？

睇番Ansheles條片，原來佢之前曾帶過妹妹去「澳牛」，諗住感受下點樣食嘢都被人鬧啦！點知個侍應哥哥同Ansheles有講有笑，真係太陽由西邊升起！

好啦！之後到鄭金鈴條片，又係有侍應哥哥認得佢，仲好好聲氣講句：「慢慢食！」呢句說話竟然會出自「澳牛」哥哥把口！

Tags : KOL YouTuber 澳牛