港媽搭的士拜祭BB忘記落葬位置 司機：無心唔好拜
和合石紀念花園屬於食環處轄下的一個放置骨灰安置所，分為東翼、西翼等區域，市民可選擇將先人骨灰回歸大自然，撒放在紀念花園內作綠色殯葬，或存放骨灰。最近有港媽打算到和合石拜祭2年前夭折的BB，於是在媽媽的陪同下一起乘坐的士前往，上車後向司機指示「唔該，和合石啊」，司機再回她一句：「和合石邊到？」，但港媽稱，因忘記了BB落葬的位置，無法交代正確位置，只拋下一句：「紀念花園嗰到，或者我帶你路啊」，豈料司機此時直接道：「紀念花園？邊到係紀念花園？你哋啲人年年拜山都講唔出去邊度拜，你哋個祖先係我㗎？咁無心就唔好去拜啦！」
港媽指，對於BB剛離世的媽媽而言，司機此番言論猶如「喺傷口上灑鹽」，指「無心就唔好去拜呢一個真係心都裂埋」，當場已禁不住流淚，最後因封路而提早下車，自己步行上去。起初以為網民看到此經歷後均會一面倒「怒插」司機傷人言論，誰知網民反應完全大相反，其中一方為的士司機護航，另一方則為同情BB。
網民：的士司機無錯 和合石成個山咁大
網民指，「的士佬把口係衰格，但亦都係講出事實嘅重點」、「你傷心一件事，講地址講到一嚿嚿係另一件事，同司機西唔西有咩關係」、「下次不如掛個牌係心口話：『玻璃心，小心應對』啦」、「的士司機唔會知你啱啱無咗bb」、「呢舖撐的士啊，成個山頭都叫和合石你去晒啊？」、「司機老奉知你心情唔好？玩mood 就自己行上山！」；亦有網民同情BB，指「一開始賣慘先，無形中要人同情咗你覺得司機衰，但其實係自己bb咁重要都可以唔記得」、「作為一個二十幾歲就已經失去父母嘅我，我永遠都會記得自己父母葬咗喺邊，所以唔需要情緒勒索我」、「對你咁重要嘅野你可以忘記，即係其實唔係咁重要」、「BB都會好傷心，媽媽唔記得咗自己喺邊」。