林超英重點推介最新消暑神器 力推比USB風扇更好用
天文台預料未來數天香港天氣持續酷熱，最高氣溫高達35度，而前天文台台長近日接受訪問時提醒上水及粉嶺區居民，在「秋老虎」及台灣颱風「梅花」雙雙影響下，華南吹微北風把內陸熱氣帶到香港，兩區將會十分高溫，街坊避免出街曝曬要多飲水。而林超英亦推介自己的新寵 —— 掛腰電風扇，他指最近經常有市民在腰間掛上一部體型細小的電風扇非常有用，可把風吹到衣服內，身體表面有風吹就能帶走熱氣。
林超英慨歎以前過得太好 結果而家㷫到焫親自己
他指價錢雖貴過USB風扇，約百多元一部，但效能非常好，亦強調市民應減少用電，「一人行一步就會有好大成果，大家學吓我咁少啲開冷氣啦」。他憶述指小時候過中秋節，當時都已穿冷背心，惟香港人生活過得越來越好，用電量大增，冷氣使用量有增無減，令到燒煤釋出的二氧化碳上升，造成溫室效應，加上全球暖化問題嚴重，酷熱天氣難以改善。他指「我哋幾十年前生活得好，結果而家就㷫到焫親自己，大家學吓我開少啲冷氣啦！」
網民：幾十年前都無咁多人要住劏房啦
開冷氣與否，這個觀點爭持了不少年，有網民聽到林超英的這番言論後作出連番反駁，指「用幾十年前嚟比，當時都無咁多劏房戶啦，而家劏房密密麻麻衰過幾十年前，無窗嗰啲唔開冷氣係咪焗暈自己」、「幾十年前你哋嘆咗，幾十年後要啲後生捱返你哋種下嘅惡果？你講出嚟都好意思」、「公平啲，你叫返你同歲數嘅人唔好開冷氣，留返啲quota畀後生過得好啲，到我哋老咗，我哋唔開冷氣，年代交替囉」、「都係嗰句啦，你喺35度住劏房一個月唔開冷氣，捱到無事就聽你講少D開冷氣囉」、「如果唔使出街見人我可以唔開冷氣留喺屋企，你幫全部人爭取WFH，公司冷氣都慳埋」。
不過亦有網民指樂見林超英再進一步，不再只使用USB風扇吹溫柔的風，指掛腰間的風扇是不少人外出恩物，建議大家在屋企時可試用取代冷氣，表示「以前我哋嗰代無冷氣都生存到，而家後生仔寵慣咗啫！」
