撰文：C｜圖片來源：《中居正広の金曜日のスマイルたちへ》
日本醫生的最強正確飲食術
節目組找來非常關注健康同美容嘅100位主婦做問卷調查，將8個飲食新常識按「震驚度」排列順位，睇睇你嘅飲食習慣有冇出錯！
第8位：唔想肥反而要食牛油！
平時買麵包，大部分人都偏向揀白麵包，覺得牛油使用量少，夠晒plain唔會肥。但係醫生話，其實呢個做法係錯嘅！
睇返100g牛油嘅營養成分表，脂肪佔81g，呢個數字係大多數人對牛油避之則吉嘅原因。但醫生指出，卡路里同肥胖並不掛鈎，糖分（碳水化合物）先至係致肥嘅元兇！
攝取過多糖分，會令血內嘅葡萄糖值上升（血糖值），而為咗減低血糖值，胰臟會分泌出胰島素調節糖的代謝。胰島素會將葡萄糖轉化為能量，而剩餘嘅葡萄糖，則會轉化成脂肪儲存起，多餘嘅糖分先至係致肥嘅原因！
100g嘅牛油裡面，糖分只佔0.2g。以核桃嚟做比較嘅話，100g嘅牛油糖分含量，竟然只等於一個核桃！
除此之外，牛油嘅油脂更可於胃部形成保護膜，抑制糖分吸收！
食搽咗牛油嘅白麵包，經消化、分解後形成嘅葡萄糖中，因為被牛油嘅油脂包裹住，有效減慢糖分嘅吸收，較不會致肥。
以牛角包同白麵包相比，一個牛角包含有18g牛油，而一片白麵包只有2g牛油。意味住牛角包因為多量牛油形成嘅保護膜作用，更有效抑制糖分嘅吸收。
聽醫生講兩句就一定啱喇咩！於是節目組就用畀糖尿病患者使用嘅「血糖值測定器」做實驗測試，睇睇血糖值嘅變化。
血糖值高嘅話，表示血中糖分含有量高，亦即較容易引致肥胖。
節目組喺工作人員手臂上裝上檢測血糖值嘅儀器，再分別喺食用牛角包、白麵包後約90分鐘測量血糖值。結果食用牛角包後嘅血糖值為83，而白麵包則係103！
醫生話唔係唔食得白麵包，但係喺麵包上搽牛油後再食，會更有效防止肥胖。
第7位：喺納豆中加雞蛋其實好「浪費」！
雖然香港人較少機會接觸到納豆呢種食物，但其實納豆係superfood嘅一種！含有健康必要嘅5大營養素，包括蛋白質、脂質、碳水化合物、礦物質、維他命。
而且更含有帶有美肌效果嘅一種維他命B：生物素。生物素可幫助體內嘅膠原蛋白形成，促進頭皮血行。
日本人喜愛將生蛋同納豆混合嚟食，但原來蛋白中所含有嘅，稱為「抗生物素蛋白」嘅一種蛋白質，會阻礙「生物素」嘅吸收！
當「抗生物素蛋白」（蛋白）同「生物素」（納豆）遇上，會令呢種營養素無法被吸收！
將兩者混合，會使納豆本來嘅營養素消失！所以食納豆時唔好加入全蛋，只加蛋黃就夠！
另一方面，納豆中更含有稱為「納豆激酶」嘅酵素蛋白質，可有效保護血管健康。而納豆黏黏膩膩嘅部分，可從胃酸中保護呢種酵素營養。
為咗令呢層黏絲嘅狀態更好，醫生建議於食用時，預先充分攪拌好。
第6位：將wasabi溶落豉油係極不正確！
Wasabi嘅辣味係來自稱為「異硫氰酸烯丙酯」嘅成分。
而「異硫氰酸烯丙酯」有改善血流狀態嘅效果，令血液流動暢通。每日攝取5g wasabi就可以有效改善血液狀態，令血液流動更暢通。
之但係，由於呢種成分係水溶性，所以一旦溶到豉油就會流失！
有見及此，雖然會較為麻煩，但醫生推薦將wasabi放喺刺身上再點豉油，係最好嘅食法！
食蕎麥麵時都一樣，比起將wasabi倒到麵汁中溶開，將wasabi放喺麵條上食用係最好！只要唔溶開wasabi，就可以保留呢種營養成分。
第5位：銀杏有效改善老人癡呆！
雖然銀杏嘅味道非常獨特而強烈，但其實係對健康十分好嘅食物！醫生話，銀杏更加有改善老人癡呆嘅功效！
不過，銀杏其實帶有毒性，不宜過度食用，成人一日最多食40個，小朋友最多7個。
另一方面， 醫生更講出咗一個超級震驚嘅醫學見解！就係脂肪無論攝取幾多，都未必致胖！！
醫生指，以日本人為例，一日會攝取75g-80g脂肪，但體內其實會將脂肪用到盡！並唔會儲存起變成肥肉！
攝取脂肪後，脂肪會轉化成脂肪酸，而脂肪酸會再變成脂蛋白。
呢種脂蛋白會用於製造細胞膜、荷爾蒙同膽汁！都係維持身體正常運作嘅作用。但脂肪並唔會100％用得完，用唔完嘅脂肪原來係會經由排便而排出身體外，並唔會殘留於體內。
所以醫生話，日常大家都認為「好肥」嘅蛋黃醬，即使脂肪含量高，但其實唔會致肥！咁肉類嘅肥肉脂肪呢？醫生表示，肉嘅脂肪反而係應該攝取嘅部分！
坊間經常聽到「攝取得多脂肪，會提升腦中風、心肌梗塞嘅機率」，醫生就話實際上係調返轉！
根據2013年日本筑波大學嘅研究，花費11年追查8萬人關於飲食生活同病症關係嘅調查，發現攝取得多肉嘅脂肪，其實可以有效減少腦出血、腦梗塞嘅發病率！
因此得出，比起完全唔食，多食肉類脂肪，其實更可有助延年益壽嘅結論。
第4位：綠茶帶有高效減肥效果
綠茶中嘅苦澀成分，「兒茶素」具有殺菌、燃燒脂肪嘅效果。
呢種「兒茶素」同時更有降低血糖值嘅效果！根據2012年美國賓夕凡尼亞州立大學嘅研究，利用老鼠測試檢驗血糖值變化。一隻老鼠投放喺一般粟米粉糧食，另一隻則於粟米粉中加入兒茶素粉末，發現食咗兒茶素粉末嘅老鼠，血糖值有所下降！
投放咗畀老鼠嘅兒茶素分量，以給予人類嘅分量換算，相等於1杯半嘅綠茶。
醫生表示，邊飲用綠茶，邊攝取碳水化合物，可有效抑制肥胖！
綠茶主要分為煎茶、番茶、玉露3大類，其中「兒茶素」含有量最高嘅係煎茶。
而攝取得最多「兒茶素」分量嘅溫度係70℃。食碳水化合物時怕致肥嘅話，不妨配返杯熱綠茶飲用啦！
第3位：飯前食乳酪會減弱效果！
醫生指，腸道裡嘅雙尾菌會隨年齡增長而減少，超過50歲後，更會跌至幼年期嘅1/100以下。
我哋一般都普遍認為，飯前食乳酪可以提供一個乾淨嘅腸胃環境畀益生菌發揮功效，但醫生就話呢個做法其實係錯嘅！因為乳酪中含有嘅「雙尾菌」益生元素對胃酸好弱！
空腹時嘅胃部，因為胃酸強勁，呢個時候即使食乳酪，雙尾菌都幾乎會全被胃酸殺死。
而飯後嘅胃，因為胃酸處於中和狀態，雙尾菌可以免於死亡，並成功流到腸臟嘅機率較高。
不過習慣飯前食乳酪嘅人都唔使灰心！醫生話喺胃中死亡嘅雙尾菌，會轉化成益生菌嘅食糧，有效增加體內持有嘅雙尾菌數量。
另外，因為蔬菜屬於鹼性，可有效提高雙尾菌嘅效果！醫生推薦喺食乳酪前，先食蔬菜。
第2位：枝豆不能經熱水煮！
枝豆係減肥恩物，有提高脂肪燃燒嘅營養成分！
其中一種成分稱為「膽鹼」，可將脂肪及糖分轉化成能量。
另一種成分稱為「鳥氨酸」，有效促進脂肪及糖分嘅燃燒，有助減肥！
但係呢兩種成分好容易溶於水中！用水烹煮會導致呢兩種難得嘅營養流失！
醫生推薦嘅其中一種食法，係用焗爐烤10分鐘或以上，但要避免生食！
另一個推薦嘅食法，係蒸煮約7分鐘。重要嘅嘢要講多次！避免生食！
第1位：飲酒可以延年益壽係真嘅！
研究終於證實，日飲1～2杯酒，其實係長壽嘅秘訣！
美國加州大學曾經對1,600個以上高齡者進行調查，調查酒同死亡率嘅關係。
研究發現，每晚飲1～2杯酒嘅高齡者，比不沾酒精嘅高齡者，死亡率低18%。
唔止美國曾經做過研究，英國都喺今年4月發表咗研究，指每星期攝取100g以下酒精量，可有效減少腦中風、動脈瘤、心臟疾病同死亡風險！
100g酒精量即係幾多？以紅酒為例嘅話，相等於一星期5杯以內（1杯175ml）。
而以罐裝啤酒為例嘅話，則等於一星期7罐以內（一罐350ml）。只要不過度飲用，酒其實係有助身體健康！
最後，醫生提點返，唔好追求健康追到有壓力！因為壓力先至係導致病痛嘅最大根源！