一對新人為咗擺酒回本可以去到幾盡？
雖然我衷心祝福一對新人幸福快樂，但有一樣嘢，令我變得愈來愈唔鍾意去婚宴……就係「禮金」。
如果係真心朋友，出錢出力做埋兄弟都冇問題，成班兄弟癲番晚，有時仲開心過結婚嗰對新人。不過，如果你邀請我出席，只係想攞「禮金」為咗擺酒可以回到本，我唔去又唔好意思，去又覺得被你劏咗刀咁……
喺香港結婚、買樓、生仔……樣樣都係錢。為咗擺酒可以回本可以去到幾盡？
依家新郎新娘好流行先用WhatsApp 開group，問實有幾多個兄弟姊妹去，再訂酒席同買餅卡，實行一張餅卡都唔好浪費。
人唔到禮都要到！
另一個潛規則就係，即使唔派餅卡畀你，人唔到禮都要到。只要你「被通知」有朋友結婚，就需要畀「禮金」，連酒席錢都慳番。
試想像下，有日你一起身，無啦啦被某位好多年冇見嘅朋友加咗入群組，然後被告知佢要結婚，咁你就要交出大利是，成個過程都係被動……
不過講到最傷兄弟姊妹情嘅，莫過於應該畀幾多錢人情先合理。有啲新人比較厚面皮，會喺群組講明要求最低入場費八百，做兄弟更加要畀一千。仲記得五、六年前仲考慮緊畀三百定五百，香港真係乜都通脹。
寒酸親戚一家五口畀一百蚊……
曾經試過有朋友唔願畀咁貴，開口問新娘：「我哋朋友就要畀八百，想問你啲親戚帶埋一家大細嚟飲，會畀幾多？」
冇錯，親戚去飲係最著數，帶齊小朋友都係畀一份錢，有寒酸嘅親戚擺低份結婚禮物，連「禮金」都唔畀。
難為成班兄弟姊妹為咗「禮金」傷感情，其實好大程度都係想填番親戚條數。最誇張試過畀一百蚊，帶埋一家五口。廿蚊一位十幾道菜，你話去邊度搵吖～
