撰文：Mila｜圖片來源：網上圖片、《新假期》資料庫｜原文刊於《新假期》
學校沒教的搭車禮儀！
1. 切勿大力閂車門
呢一項係大忌嘅第一位！很多人平時搭開的士，因為驚閂唔實車門，所以習慣大大力閂車門。但私家車嘅車門比起的士嘅車門設計更為複雜，可能有很多按鈕，所以相對上較脆弱，大力閂車門，分分鐘會震壞車門上嘅零件，整一整又要幾千蚊，車主真係多得你唔少！所以大家下次閂車門嘅時候，記得溫柔番啲喇！
2. 切勿唔睇清楚就開車門
唔開大個車門點落車？開大車門當然係冇問題，問題係冇睇清楚車門外面嘅情況就一嘢用力推門。很多時候，車門外可能係欄杆或者石壆，如果呢兩樣嘢的高度比較低，遮住視線，會搞到一開門就刮花車門。最慘係開門嗰陣，撞花咗隔籬車的車門，到時都唔知邊個賠好。
3. 唔好一嚟就坐後座，剩番車主喺前面
唔講你可能唔會為意，坐私家車時，一嚟就坐後座，留空副駕，剩番車主喺前面揸車，其實十分不尊重。無論係因為大家搭的士習慣了，又或者係覺得副駕位唔敢亂坐，但咁樣會畀人一種「當人係的士司機」的感覺。因此，如果只係得你一個，或者架車未坐滿人嘅時候，都盡量唔好留空副駕位，以示對車主嘅尊重。
4. 一上車就喺副駕睡覺=唔尊重
就算你避開了上一個行為，好醒目咁坐上副駕位，但你都可能會犯這個禁忌。就係一上車就在副駕位瞓覺，特別係坐長途車/自駕遊嘅時候，咁樣一樣會令到車主唔係太好受。因為揸長途車其實都幾攰，所以，最好就適當地同車主傾下偈，令到佢冇咁苦悶。不過，如果你真係好攰，可以嘗試輕輕同車主說明原因才去睡，相信佢都會體諒，唔好誤會你。
5. 喺車上面食嘢要小心
好多車主都唔鍾意乘客喺佢架車上面食嘢，特別係鹽酥雞、薯片等食物，一來容易被車內的物料吸味道，二來碎屑多，難以清理，容易惹蟲，清潔十分麻煩。
6. 唔好係咁亂撳啲掣/開櫃
坐車隨意亂撳車上的掣或者亂開人啲櫃，係非常失禮嘅行為。道理同去人哋屋企一樣，你都唔會去到人哋屋企就隨便入房開人哋個衣櫃啦！
7. 勿對人哋架車評頭品足
好多男人都當架車係第二個老婆，你彈人哋架車舊、牌子垃圾，或者顏色唔好睇，就等於直接同佢講「你taste好差」一樣，冇人會想聽。所以都係厚道啲，除非人哋問你意見，如果唔係，都係收下把口啦！
唔知大家有冇曾經唔覺意做過失禮乘客呢？下次坐朋友車，就記得要留意喇！各位車主仲有冇遇過其他1秒激嬲你嘅行為呢？
撰文：Mila｜圖片來源：網上圖片、《新假期》資料庫
