新年來了！雖然有幾日假期，但大家都應該忙住去拜年。拜年喺長輩眼中，可能意味住一家團聚，但後生一輩可能唔係咁認為。
因為拜年，就意味住「婆媳大戰」又一觸即發！
難為了男生 拜年慘變婆媳戰場！
我朋友阿晨從佢同女朋友拍拖開始，就一直處於戰線邊緣，直頭好似戰地記者咁。但無奈嘅係，阿晨只係一個想報道天氣嘅記者，卻不斷被捲入戰爭之中。
阿晨對於婆媳戰爭嘅觀點係：「依家嘅情況就好似兩個女人搶一個男人，點會和平吖！我覺悟㗎喇～少見面就少爭執，少見面都可以忍氣吞聲，始終係長輩，但見得多，就一定戰到至死方休。」
阿晨仲記得第一次帶女朋友見家人就係食團年飯，老人家好注重「團年」，阿晨就打算喺呢個喜慶日子帶女朋友返去見父母。
手掌係肉 手背又係肉！
估唔到，阿晨母親一見到佢女朋友，就講咗一句：「帶佢走，今日係家人團年，唔想有外人存在。」
女朋友聽到之後嬲到即刻走，阿晨亦做咗一件好錯好錯嘅事……
就係佢聽咗佢阿媽嘅說話，冇理到女朋友，返咗入屋食飯。
男女身分互換 結果會否不一樣？
婆媳仇恨就係因為呢件事而形成，每年拜年都被迫要見面，女朋友死都話有嘢做所以遲到，而阿媽亦故意喺班親戚面前為難，要求女朋友既然遲到，不如幫手買啲水果上去，仲要切埋畀大家食，以表孝心。
所以，阿晨每年拜年都好大壓力，又唔可以去旅行避年，因為阿媽會將責任推卸喺女友身上。
「將來我結婚生咗仔，一定唔會畀佢見！」女朋友已經下定決心同奶奶決一死戰。
不過唔知點解，阿晨去到女朋友屋企拜年就輕鬆得多，女朋友父母都好錫佢，當佢係親生仔一樣，拜年又有年糕食，又有老火湯水飲。
阿晨有時喺度諗，如果換轉佢係女人，女朋友係佢男友，結果又會否不一樣呢？
